BBVA Liga
Athleticek bi puntu utzi ditu Sevillan (1-1)
L.E. | eitb.com
Zuri-gorriek partida kontrolpean izan dute eta penalti bat alferrik galdu dute lehen zatiaren azken minutuan.
Your browser doesn’t support HTML5 video
Athleticek berdinketa baino ez du lortu Sanchez Pizjuanen, nahiz eta hiru puntuak eramateko neurketa jokatu. Sevilla mende izan dute, baina azken metroetan asmatzea falta izan zaie.
Partidak hasiera bizia izan du. 10. segundorako, Sevillak baloia Athleticen arean jarri du eta Iraizoz azkar ibili da andaluziarren erasoa eteteko.
Laugarren minutuan egin dute gola Unai Emeryren gizonek. Kornerra atera, baloia Alberto Merinok hartu du area barruan, jokaldia egin eta Iraizoz gainditzea lortu du.
Zuri-gorrien erantzuna bi minutu geroago iritsi da, sevillarrek atzean egindako akats galantari esker. Toquero zuhur ibili da, baloia lapurtu du, jaurti eta Susaetak bultzada txikia baino ez dio eman etxekoen atean sartzeko. Norgehiagoka berdinduta zegoen berriro ere.
Ondorengo minutuetan, Athletic Sevillaren hasierako nagusitasuna gainditzen hasi da eta erraz egin du gora, baina azken metroetan asmatu barik.
Betok erantzun bikaina eman dio Muniainek urrutitik egindako jaurtiketari. Beste horrenbeste egin du gero Iraizozek Faziren aurrean.
39. minutuan, Undiano Mallencok baliorik gabe utzi du Mbiaren gola, Sevillako hiru jokalari jokoz kanpo zeudelako; eta 45. minutuan penaltia adierazi du Athleticen alde, Baccak area barruan baloia eskuarekin ukitu ondoren. Susateak jaurti du; eta Betok, gelditu.
Aukera gutxi
Bigarren zatian gol aukera oso gutxi izan dira, eta ez oso argiak. Laportek buruz kanpora bidali du baloia 56. minutuan eta Adurizek gauza bera egin du 88.ean.
Bilbotarrek Sevilla estutu dute, baina ezin izan diote alde izan duten egoerari etekinik atera. Berdinketarekin konformatu behar izan dute.
Fitxa teknikoa
1 - Sevilla: Beto; Figueiras, Fazio, Cala (Iborra, 60. min), Fernando Navarro; M'Bia, Carriço; Vitolo, Reyes (Perotti, 66. min), Alberto; eta Bacca (Gameiro, 78. min).
1 - Athletic: Iraizoz; De Marcos, Gurpegui, Laporte, Balenciaga; Iturraspe, Mikel Rico (San José, 90. min); Herrera, Susaeta (Ibai Gómez, 82. min), Muniain; eta Toquero (Aduriz, 61. min).
Golak: 1-0, 4. min: Alberto. 1-1, 6. min: Susaeta.