'Barçari Liga bakarrik geratzen zaio, eta horri helduko diote'

"Ez dakit guretzako hobea ala okerragoa den Bartzelonak Kopako finala galdu izana. Gauza da orain Liga irabaztea dela aurten tituluren bat eskuratzeko duten aukera bakarra, eta horri sendo eutsiko diotela. Liga irabazteko aukera horri azkenera arte eusteko gaitasuna dute", esan du Ernesto Valverde Athleticeko entrenatzaileak, Bartzelonaren egoeraz galdetu diotenean. Bilbotarrek Camp Noun jokatuko dute igandean.

"Barçari, azken urteetan bizitako garai gozoen arabera epaitzen zaio, baina konparazio horrek edonor uzten du gaizki", esan du entrenatzaileak, kataluniarren "aroaren amaieraz" galdetuta.

"Aurreko urteetan egindakoarekin alderatzen dute; orduan dena irabazten zuen, eta joko ikusgarria eginda. Tituluak irabaztera erraz ohitzen gara, eta ez gara konturatzen bolada hori momenturen batean amaitu egingo dela. Garaipenak onartzea oso erraza da; porrotak onartzea, ez hainbeste".

Azkenik, Valverdek esan du kataluniarrek "azken astean tituluren bat irabazteko bi aukera galdu arren", igandeko partida "beti bezain zaila" izango dela adierazi du zuri-gorrien entrenatzaileak.