Bi denboraldiz
Andoni Iraolak Zipreko AEK Larnaka entrenatuko du
agentziak | erredakzioa
Bi denboraldirako kontratua sinatuko du, eta Imanol Idiakez aurreko entrenatzailea ordezkatuko du karguan.
Andoni Iraola. Argazkia: EiTB
Andoni Iraola (Usurbil, 1982) Athleticeko jokalari ohia Zipreko txapelketan lehiatzen duen AEK Larnakako entrenatzailea izango da datozen bi denboraldietan.
Iraolak Imanol Idiakez aurreko entrenatzailea ordezkatuko du karguan, hark taldea utzi baitu Kopako txapelketa irabazi eta gero.
Aipatzekoa da AEK-ko kirol zuzendaria Ander Murillo donostiarra dela, zeinarekin batera Iraolak Athleticen jokatu zuen hainbat denboraldiz. Murillo hasi berria da zuzendaritza-zereginetan, aurtengo denboraldia amaitu ostean erantsi baitu jokalari-elastikoa klubeko kirol-ardurak bere gain hartzeko.
Horrenbestez, Murillok hartu duen lehenengo erabakietako bat Iraola entrenatzaile zereginetarako kontratatzea izan da. Usurbildarra 2016an erretiratu zen Athleticekin 512 partida jokatu ondoren, 12 denboralditan zehar (2003-2015). Horrez gain, beste 40 neurketatan aritu zen AEBko New York City taldearekin (2015-2016).
Iraolak Donostiako Antiguoko taldean eman du azken denboraldia bertako jubenilak zuzentzen, UEFA B mailako entrenatzaile diploma behin eskuratuta.