Azken 8 denboraldietan
Sevillaren aldeko 2-0ekoa, Athleticen aurka Pizjuanen gehien errepikatu den emaitza
Erredakzioa
Talde zuri-gorriak sei porrot jaso ditu Sanchez Pizjuanen jokatu dituen azken hamar partidetan.
2019ko Errege Kopako Sevilla-Athletic Club partidako irudia. Argazkia: EFE
Athleticek Sevilla izango du aurkari urtarrilaren 3an Sanchez Pizjuanen, Ligako 19. jardunaldiko partidan. Sevillaren estadioa ez zaio ondo ematen talde zuri-gorriari, bertan jokatu dituen azken hamar partidetatik sei galdu egin baititu.
Sevllaren aldeko 2-0ekoa da gehien errepikatu den emaitza azken urteetan, lau alditan eman baita. Andaluziako taldeak 2-0eko emaitzarekin irabazi zion Athletici, 2018-2019, 2017-2018, 2015-2016 eta 2014-2015 denboraldietan. Gainera, Sevillak 1-0 irabazi zien zuri-gorriei 2016-2017 denboraldian, eta 2-1eko emaitzarekin 2012-2013 denboraldian.
2019ko urtarrilaren 16an lortu zuen azken garaipena Pizjuanen Athleticek, 0-1eko emaitzarekin, Errege Kopako final-zortzirenetako itzuliko partidan, baina Sevillak 1-3 irabazi zuen joanekoa San Mamesen eta aurrera egin zuen. 2015-2016 denboraldian ere, zuri-gorriek irabazi egin zuten Pizjuanen 1-2ko emaitzarekin Europa Ligako final-laurdenetako itzuliko neurketa, kanporaketa berdintzea lortu zutelarik, baina luzapena golik gabe amaitu zen, eta penalti jaurtiketetan Sevilla atera zen garaile (5-4).
Ligan Athleticek Sevillari irabazi zion azken partida 2011ko azaroaren 20an izan zen 1-2ko emaitzarekin, Iraolaren eta De Marcosen golekin. 2013-2014 denboraldian, bana berdinduta (1-1) amaitu zen bi talde hauen arteko norgehiagoka.