Ostegunean, 21:05ean
Athletic-Salzburgo: F multzoko lidergoa sendotzea helburu
Erredakzioa
Hirugarren garaipena eskuratu nahi du Bilboko taldeak eta multzoko lidergoari eustea. Ander Herrerak hasieratik joka dezake.
Athletic. Argazkia: EFE
Athleticek Salzburgo taldea hartuko du ostegun honetan San Mamesen (21:05) Europa Leagueko multzoen faseko hirugarren jardunaldian. Hirugarren garaipena eskuratu eta F multzoko lidergoa sendotzea du helburu Bilboko taldeak. Bratislavako Slovan 1-2 hartu zuen mendean aurreneko partidan eta bigarrenean 2-0 gainditu zuen PSG etxean.
Bielsak Osasunaren aurka erabilitako hamaikako bera zelairatuko du segur aski. Nobedade bakarra Ander Herrera izan daiteke.
Salzburgo bolada txarrean iritsiko da Bilbora: Bundesligan irailaren 18an lortu zuen azken garaipena. Europa Leaguen, 3-1 galdu zuen PSGren kontra eta Slovani 3-0 irabazi zion.
Athletic Club: Iraizoz; Iraola, Ekiza, Amorebieta, Aurtenetxe; Javi Martinez; Susaeta, De Marcos, Muniain, Gabilondo; eta Llorente.
Salzburgo: Eddie Gustafsson; Ibrahim Sekagya, Andreas Ulmer, Franz Schiemer, Christian Schwegler, Petri Pasanen; Simon Cziommer, Jakob Jantscher, Dusan Svento, Gonzalo Zarate; eta Leonardo.