Athletic-Atletico Madril (3-0): Gol zaparrada San Mamesen

Fernando Llorente, bi golekin eta Gaizka Toquero beste gol batekin garaipena eman diote etxekoei. Neurketa oso bizi hasi da eta ez du jaberik izan. Bi taldeek baloi jabetza lortu nahi zuten, baina ez dute mendean hartzerik lortu. Godinek Susaeta lurrera bota du madrildarren area barruan. Jokalariek penaltia eskatu dute, baina epaieleak ez du ezer adierazi.

Ez da neurketa ona izan lesioentzako. Lehenengo Amorebieta eta gero Javi Martinez aldageletara joan behar izan dira min hartuta. Llorente ere berdegunea uztekotan egon da, baina jokatzen jarraitzeko eskatu dio Bielsari.

Falcao eta Filipe Luisek zenbait susto eman dizkiote Iraizozi, baina Athleticek ez du etsi eta hutsuneak bilatu ditu madrildarren defentsan. Llorentek eta De Marcosek arriskuarekin heldu dira Courtoisen areara behin baino gehiagotan.

Bigarren zatian, zaparrada heldu da, eguraldiarena eta golena ere. Lehenengo gola Atletico Madrilen defentsaren despistearen ondorioz ailegatu da, 67. minutuan. Filipe Luisek baloia bere atera desbideratu du Courtoisen etsipenerako eta Llorentek aukera aprobetxatu du markagailua martxan jartzeko. Minutu batzuk geroago bigarrena heldu da. Llorentek sartu du buruz Toquerok eskuinetik egindako erdiraketa bikainaren ondoren. Toquerok berak egin du hirugarrena. Ander Herrerak ezkerretik erdiratu eta Toquerok 3-0koa jarri du markagailua.

Garaipen honekin, Athleticek zazpi neurketa daramatza galdu gabe, horietako bost Ligan. Zortzigarren kokatzen da sailkapenean eta Europako postuak hiru puntura ditu.

Fitxa teknikoa

3 - Athletic Club: Iraizoz; Iraola, Ekiza, Amorebieta (San Jose, 18. min), Aurtenetxe; Javi Martinez (Herrera, 49. min); Susaeta, Iturraspe, De Marcos, Muniain (Toquero, 64. min); eta Llorente.
0 - Atletico Madril: Courtois; Silvio, Miranda, Godín, Filipe Luis; Assunçao, Gabi; Reyes (Salvio, 58. min), Diego (Koke, 80. min), Arda Turan (Domínguez, 72. min); eta Falcao.

Golegileak: 1-0, 67. min: Llorente. 2-0, 71. min: Llorente. 3-0, 74. min: Toquero.

Epailea: Fernando Teixeira Vitienes. Txartel horia Javi Martinez, Aurtenetxe eta Ekizari Athleticen eta Godín, Silvio, Miranda, Salvio eta Assunçao Atletico Madrilen.