Igande honetan San Mamesen
Athletic-Reala derbirako prest
Erredakzioa
BBVA Ligako sailkapena pil-pilean da eta Bilboko derbia zirraragarria izango da. Zuri-gorrien eta txuri-urdinen artean lau puntuko aldea baino ez dago.
Athletic-Reala, artxiboko irudia. Argazkia: EFE
Igande honetan Athleticek eta Realak neurtuko dituzte indarrak San Mamesen, 16:00etatik aurrera. Lau puntuko aldea dago sailkapen nagusian zuri-gorrien eta txuri-urdinen artean, baina Marcelo Bielsaren gizonak Txapeldunen Ligatik hurbil dauden bitartean Montanierrenak arrisku postuetatik urruntzen ari dira pixkanaka-pixkanaka.
BBVA Ligako sailkapena pil-pilean da eta Bilboko derbia zirraragarria izango da, ziur. Athleticek urrezko puntua batu zuen aurreko jardunaldian Madrigalen Vila-realen aurka (2-2) eta Realak Granada gainditu zuen etxean Imanol Agirretxeren golarekin (1-0).
Old Traffordeko Manchester Uniteden kontrako norgehiagokari aurre egin aurretik garrantzia handiko beste hitzordu bat dute bilbotarrek, San Mameseko neurketa.