Bazkideek aurreko denboraldiko kontuak onartu dituzte, baina atzera bota dute Elizegiren azken aurrekontua

Athletic Clubeko bazkide konpromisarioek onartu egin dituzte Aitor Elizegi buru duen Zuzendaritza Batzordeak aurkeztu dituen aurreko denboraldiko kontuak; haatik, ezezkoa eman diote aurtengo denboraldirako aurkeztutako aurrekontuei, eta, gainera, gaitzetsi egin dute zuzendaritza zuri-gorriaren kudeaketa.

Hala, 2020-2021 denboraldiari dagokion balantzea, 25,4 milioi euroko defizita aurkezten zuena, izan da Elizegik aurrera atera duen bakarra. Kontu horiek aldeko 520 botorekin (% 57,1) berretsi ditu zuzendaritzak; 368 izan ditu kontra ( % 40,4), 13 boto zuri, 9 baliogabe eta 4 abstentzio, botoa eman duten 910 bazkideen artean.

Bestalde, 2021-2022 denboraldiko 140,8 milioiko aurrekontuaren bozketari dagokionez, bazkideek ezezkoa eman diote. Aurrekontu horiek diru-sarrerak 5,4 milioi euroan murriztuko zirela aurreikusten zuten, covid-aren pandemiaren eraginez. Halaber, bazkide guztientzako 120 euroko 'covid kuota' lineala jasotzen zuten, bazkideen artean hautsak harrotu dituena.

Hala, zuzendaritzaren proposamen horrek 402 baiezko bozka jaso ditu, (% 44,1) eta 478 ezezko (% 52,5). Horrekin batera 23 boto zuri, 7 baliogabe eta 4 abstentzio jaso ditu. Hori dela eta, Elizegiren Zuzendaritza Batzordea behartuta dago ezohiko batzar bat deitzera.

Aurreko denboraldian Zuzendaritza Batzordeak egindako kudeaketa ere gaitzetsi dute bazkideek. Aldeko 381 boto (% 41,8), kontrako 492 ( % 54), 23 zuri, 14 baliogabe eta 4 abstentzio izan dira bozketa horren emaitzak.

Biltzarreko azken eta laugarren bozketan, Cesar Saez Hidalgo Zuzendaritza Batzordeko kide berri gisa sartzea onartu dute bazkideek, 555 botoren babesarekin eta aurkako 248 botorekin.

Horrez gain, Athleticeko presidenteak, gainera, biltzarrari hasiera eman dion hitzaldian aurreratu du ez dela 2022ko ekainean izango diren hurrengo hauteskundeetara aurkeztuko.