Athleticen hurrengo aurkaria
Sporting Portugal taldearen analisia
A.B.
Erredakzioa
Sa Pintok zuzentzen du Lisboako taldea. Bertan jokatzen dute Espainiako Ligatik pasatakoak diren Diego Capel, Jeffren Suarez eta Matias Fernandez 'Matigol' jokalariek.
Ricardo Sa Pinto entrenatzailea eta Andre Castro jokalaria garaipena ospatzen. Argazkia: EFE
Klub portugaldarra, 1906an sortu zen eta bere palmaresean Portugaleko Ligako 18 titulu ditu, Portugaleko 15 Kopa eta UEFAko Errekopa bat ditu. Portoren eta Benficaren atzetik Sporting da Portugaleko hirugarren talde handiena. Jose Alvalade zelaian jokatzen dute eta bertan 52.000 zale sartzen dira. 2004ko Eurokopako partida batzuk han jokatu ziren eta 2005ean UEFAko finala hartu zuen. Sportingek eta Athleticek badute antza zerbaitetan, Sportingekoei ere 'lehoiak' ezizenarekin ezagutzen baitzaie.
Athleticek finalerdietan aurkituko duen aurkaria ez da makala izango. Sporting Portugal taldeko entrenatzailea Ricardo Sa Pinto (Ricardo Manuel Andrade e Silva) Realeko jokalari ohia da. 1997tik 2000. urtera arte jokatu zuen talde gipuzkoarrean Sa Pintok.
Espainiako Ligatik pasa diren jokalariak ere badaude Lisboako taldean. Diego Capel Sevillako jokalari ohiak, Jeffren Suarez Bartzelonako jokalari ohiak eta Matias Fernandez ‘Matigol’ txiletarrak ere talde honetan jokatzen dute. Jeffren da hiru hauetatik minutu gutxien izaten dituena. Capel eta Matias Fernandez oso ondo jokatzen ari dira Europa Leaguean batipat.
Jokalari hauez gain kontutan hartu beharrekoak dira beste futbolari batzuk ere. Adibidez, Emiliano Insua da defentsatik talde guztia antolatzen duena. Argentinarra defentsako nagusia da eta golak ere sartu ditu Europa League honetan. Normalean aurrelari bakarraekin jokatzen du Sportingek eta postu hori Ricky van Wolfswinkelek betetzen du. Holandarrak sartu zuen gola Metalisten aurkako itzulerako partidan (1-1).
Sa Pintok UEFA Europa League honetan gehien erabiltzen duen hamaikakoa honakoa da: Rui Patricio atezain; Insua, Carriço, Pereira, Polga eta Xandao defentsan; Schaars, Matias Fernandez, Marat Izmailov eta Andre Santos edo Andre Martins zelai erdian; aurrelari bakar moduan, Ricky van Wolfswinkel.