TADak ukatu ondoren
Yerayk ezin izango du Real Madrilen aurkako partida jokatu
EITB MEDIA
TADak ukatu egin du Athleticeko jokalariari partida bateko zigorra bertan behera uzteko kautelazko zigorra, Reale Arenan txartel gorria jasotzeagatik.
Yeray Alvarez. Argazkia: EFE
Kirol Auzitegi Administratiboak (TAD) ukatu egin du Yeray Alvarezi ezarritako zigorra bertan behera uzteko Athleticek aurkeztutako helegitea, Reale Arenan Realaren aurka jokatutako derbian jasotako txartel gorria dela eta.
Apelazio-batzordeak Yerayren partida bateko zigorra ez kentzea erabaki du aurretik, eta, hartara, erdiko atzelari zuri-gorriak ezin izango du Real Madrilen aurka jokatu urtarrilaren 22an, igandean, San Mamesen, Santander Ligako 18. jardunaldiko partidan.
Yerayk txartel gorria ikusi zuen urtarrilaren 14an jokatu zen Realaren aurkako derbian, Kubori penaltia egiteagatik. Athleticek zigorraren aurka helegitea aurkeztea erabaki zuen, baina Apelazio-batzordeak ez ditu Bilboko taldearen azalpenak onartu. Izan ere, aipatu batzordearen esanetan, froga bideografikoetan ez da akats nabarmenik ikusten Cuadra Fernandez epaileak ekintza horretan hartutako erabakiari buruz.