Eurokopan
Javi Martinezek ez du bere etorkizunaz hitz egin nahi
Erredakzioa
Guztiek arreta selekzioan izan behar dutela adierazi du Athleticeko jokalariak, "bakoitzak berean" pentsatzen badu "helburua” lortuko ez dutelako.
Javi Martinez Athleticeko erdilaria. Argazkia: EFE
Burua Eurokopan duela eta txapelketa bukatu bitartean bere etorkizunaz hitz egingo ez duela errepikatu du gaur Javi Martinez Athleticeko jokalari nafarrak. Guztiek arreta selekzioan izan behar dutela adierazi du, "bakoitzak berean" pentsatzen badu "helburua” lortuko ez dutelako.
"Hemen gauden guztiok kontu pertsonalak ditugu, baina etorkizunean eta beste taldeetan pentsatzea berekoia izango litzateke. Guztiok selekzioan pentsatu behar dugu, bakoitzak berean pentsatzen badu helburua lortuko ez dugulako", esan du prentsaurrekoan. Bayern Munich Alemaniako taldera joateko aukeraz galdetu diote kazetariek.
Zentzu horretan, Eurokopan bakarrik pentsatzea "erraza" dela adierazi du Osasunako harrobiko jokalari ohiak. "Helburu oso polita dugu, eta kontzentratzea erraza da. Eurokopa amaitzen denean galderei erantzungo diet", erantsi du.