Athletic bere hirugarren finalera sailkatzen saiatuko da

Athleticek Erreginaren Kopako finalerdia jokatuko du asteazken honetan Real Madrilen aurka Butarquen, 21:00etan, bere historiako hirugarren finalean sartzeko asmoarekin, 2012an eta 2014an jokatutakoen ostean.

Real Madrilek faborito gisa izango duen presiorik izan gabe, Bilboko taldeak Liga ahaztu eta Kopaz gozatzea izango du helburu, ilusioz gainezka dauden harrobiko hainbat jokalari tartean direla.

"Klubarentzat eta zaleentzat duen garrantziagatik Bilbora ekarri nahi dugun trofeoa da", esan du Iraia Iturregi entrenatzaileak, oso argi baitu azken bi hamarkadetan emakumezkoen futbolean erreferentzia izan den Athletic bezalako klub batentzat garaikur hau bere arasetara eramatea zein garrantzitsua den.

Bosgarren finalerdia izango da zuri-gorrientzat. 2004an, Sabadellen aurka, eta 2018an, Bartzelonaren aurka, txapelketaren azken-aurreko fasean galdu zuen; 2012an eta 2014an, berriz, Espanyolen eta Bartzelonaren aurka, finalean galdu zuen.

Iturregik Marta Unzue erdilariaren baja izango du, duela bi aste Bartzelonaren aurkako partidan eskuin belauneko aurreko lotailu gurutzatua hautsi ostean ebakuntza egingo baitiote, eta Bibiane Schulze erdiko atzelaria zalantzan dago, giharretako arazoak baititu.

Real Madrilek eta Athleticek, ligako txapelketan, elkarren aurka jokatu dituzten sei partidetako bost zuriek irabazi dituzte, denboraldi honetako biak tartean: Lezaman, 0-3 (Nahikari, Athenea eta Weir), eta Madrilen, 2-1 (Esther eta Feller/Amezaga).

Bilboko taldeak 2021eko urriaren 3an garaitu zuen Madrilgoa. Lezaman hartu zuen mendean, 2-0eko emaitzarekin. Peke eta Azkona izan ziren golegileak.