LESIONATUAK
Galarreta eta De Marcos min hartuta daude, eta ez dira izango Getaferen aurkako partidan
AGENTZIAK | EITB MEDIA
Valverdek ezin izango du bi jokalarietako bat bera ere erabili ostegun honetan, San Mamesen jokatuko den neurketan.
De Marcos, Getaferen aurka, joan zen denboraldiko neurketa batean. Argazkia: EFE
Iñigo Ruiz de Galarreta eta Oscar De Marcos Athletic Clubeko jokalariak lesionatuta daude, eta ezingo dute jokatu ostegun honetan Getaferen aurka San Mamesen, EA Sports Ligaren lehenengo jardunaldian, denboraldiaurreko zati handi batean jasan dituzten lesioak baieztatu ondoren.
Athleticek jakinarazi duenez, Galarretak "giharretako lesio arin-moderatua du ezker hankako barneko bikian". De Marcos kapitainaren ezbeharra, ostera, "pubalgia bat da", gainerako taldekideekin batera entrenatzea eragozten diona.
Bi jokalariak "taldetik kanpo" ari dira lanean Athleticek astearte honetan Lezaman egingo duen entrenamenduan, eta bi jokalariak "bilakaeraren zain" daude, berriro jokatzeko prest noiz egongo diren jakiteko.
Galarretaren eta De Marcosen hutsuneak esperotakoak dira, nahiz eta astelehen honetan talde-lanera itzuli ziren, aste batzuk euren kabuz lan egin ostean. Hala, ostegunari begira, Valverdek beste honako jokalari hauek ere ezingo ditu erabili: Unai Simon eta Julen Agirrezabala atezainak, Dani Vivian erdiko atzelaria eta Alvaro Djalo eta Nico Serrano aurrelariak.
Baja horiek guztiak lesioengatik dira, Vivianena izan ezik, astelehen honetan itzuli baitzen entrenamenduetara, Espainiarekin Eurokopa irabazi ondoren hartu zituen oporrak amaitu eta gero. Antzeko egoeran dago Nico Williams, nahiz eta hegaleko erasoko jokalariak sei egun lehenago ekin zion lanari, eta baliteke talde madrildarraren aurkako deialdian sartzea.