Europa Liga
Athleticek ezin du kale egin Olympique Lyonen aurka
Erredakzioa
Talde zuri-gorriak garaipena behar du San Mamesen txapelketatik at ez geratzeko. Partida ostegun honetan jokatuko da, 21:05ean.
Aduriz eta Llorente. Argazkia: EFE
Athleticek partida garrantzitsua du ostegun honetan San Mamesen. Olympique Lyon izango du aurkari, eta garaipena lortzea beste aukerarik ez zaio geratzen talde zuri-gorriari Europa Ligan bizirik jarraitu nahi badu.
Europa Ligako multzoen faseko laugarren jardunaldiko partida izango da ostegunekoa, eta Athletic egoera zailean iristen da. Puntu bakarra lortu dute zuri-gorriek orain arte jokatutako hiru partidetan. Israeleko Kyriat Shmonaren aurka 1-1 berdindu zuten San Mamesen, Sparta Praharen aurka 3-1 galdu zuten Txekiar Errepublikan, eta Frantzian 2-1 galdu zuten Lyonen aurka. Olympique Lyonen aurka berdindu edo galtzekotan, eta Sparta Prahak Israelen garaipena lortuta, Athleticek ez du aurrera egiteko aukerarik izango.
Bielsak ez ditu aldaketa asko egingo Granadan jokatu zuen hasierako hamaikakoarekin alderatuta. Ander Herrera egongo da hasierako hamaikako horretan, eta Ibai Gomez utziko du aulkian. Athleticen hamaikakoa, honakoa izango da: Iraizoz; Iraola, Gurpegui, Amorebieta, Aurtenetxe; Iturraspe, Muniain, Herrera, De Marcos, Susaeta; eta Aduriz.