Osasuna-Almeria, (1-0): Garaipen garrantzitsua

Osasunak garaipen garrantzitsua lortu du gaur Alemriari 1-0 irabazi ondoren eta maila mantentzeko pauso garrantzitsua eman dute gorritxoek.

Partida hasieratik Osasunak erasora jotzeko gogoa erakutsi zuen eta azkar iritsi ziren lehen gol aukerak. Hirugarren minutuan Alves atezainak ukabilez aldendu behar izan zuen Juanfranen erdiraketa bat. Zazpi minutu beranduago Arandak izkin egin zion Ortizi, baina bere jaurtiketa arazo handiegirik gabe geratu zuen Alvesek.

Osasunaren aukeren ondoren, Almeriak 17. minutuan eduki zuen bere lehen gol aukera, baina Coronaren jaurtiketari erantzun ona eman zion Ricardok. Hurrengo jokaldian gorritxoen gola etorri zen. Pandianik bikain errematatu zuen buruz Juanfranen erdiraketa on bat eta 1-0ekoa sartu zuen.

Gola sartu eta gero, Osasunak nagusi izaten jarraitzen zuen. 36. minutuan Pandianiren erdiraketa bat Alvesen ate aurretik pasa zen errematera inor iritsi ez zelarik. 45. minutura iritsi aurretik Ucheren jaurtiketa bat gutxigatik kanpora joan zen. Partida Osasunaren aldeko 1-0ekoarekin iritsi zen atsedenaldira.

Bigarren zatia hasi eta jarraian bi gol aukera izan zituen Osasunak. Lehena 48. minutuan, baina Alvesek erantzun bikaina eman zion Nekounamen burukadari. 52. minutuan Pandiani errematea egiteko posizioan zegoen, baina lokartu egin zen.

Partidako jokaldi erabakigarriena 60. minutuan gertatu zen. Ortizek eskuarekin jo zuen baloia eta epaileak penaltia adierazi zuen. Gainera, txartel gorria erakutsi zion Almeriako jokalariari. Nekounamek jaurti zuen penaltia, baina Alvesek desbideratu egin zuen bigarren gola eragotziz.

Aurkaria hamar jokalarirekin geratu ondoren jaun eta jabe izan zen Osasuna eta gol aukera argiak izan zituen partida erabakita uzteko. 67. minutuan Juanfranek jokaldi bikaina egin zuen, area barruan sartu zen, baina Alvesek gorritxoen gola eragotzi zuen. Bost minutu beranduago Camuñasen jaurtiketa langara joan zen. Bazirudien partida erabakita zegoela, baina Guilhermeren burukada zutoina urratuz kanpora joan zen.

Azkenean, Osasunak 1-0eko emaitzarekin garaipena lortu zuen Reyno de Navarran.

Fitxa teknikoa:

1 - Osasuna: Ricardo; Azpilikueta, Sergio, Miguel Flaño, Monreal; Juanfran, Puñal, Nekounam (Vadocz, 74. min), Camuñas (Calleja, 92. min); Pandiani eta Aranda (Masoud, 74. min).

0 - Almeraa: Diego Alves; Juanma Ortiz, Pellerano, Santi Acasiete (Cisma, 46. min), Guilherme; Bernardello; Crusat, M''Bami, Corona (Ortiz, 77. min), Goitom; eta Kalu Uche.

Gola: 1-0, 20. min: Pandiani.
Epailea: Rubinos Perez.