Osasuna-Bartzelona (1-2): Klasikoa, final-laurdenetan

Osasunak agur esan dio Errege Koparo Nafarroako Erresuman Bartzelonaren aurka 1-2 galdu eta gero. Joaneko norgehiagokan hartu zuen abantaila gehiegizkoa izan da Mendilibarren taldearentzat, baina gorritxoek aurpegia eman dute azken unera arte. Lehenengo zatian 1-0eko lortu du Dejan Lekicek eta Iruñeko taldeak itxura ona eskaini du berdegunean. Hala ere, bigarren zatian Bartzelona jaun eta jabe izan da eta Alexisek eta Robertok akzen 1-2koa jarri dute. Final-laurdenetan Real Madril izango da Kataluniako taldearen aurkaria.

Lehenengo zati ona jokatu du Osasunak Bartzelonaren aurka Nafarroako Erresuman. Guardiolak harrobiko jokalariak zelairatu ditu eta Mendilibarren taldea erasora, beldurrik gabe irten da. Aukera argienak gorritxoek izan dituzte, baina Pedrok gutxigatik ez du lortu 0-1ekoa 5. minutuan. Blaugranaren saiakera Asiera Riesgok ederki desbideratu du.

Patxi Puñalek izan du Osasunaren aurreneko abagune argia, baina kapitainaren jaurtiketa Pintok gelditu du. Dejan Lekicek beste aukera eder bat izan du 36. minutuan, baina aurrelariaren saiakera kanpora joan da.

Gorritxoen gola 40. minutuan lortu du Lekicek jaurtiketa gogor bati esker. Osasunako aurrelariak sare barrura bidali du baloia atsedenaldia baino lehen markagailuan 1-0ekoa jartzeko.

Atsedenaldiaren ostean Bartzelonak 1-1ekoa jarri du markagailuan. Adrianok erdiraketa ederra jarri du ezker hegaletik eta Alexis txiletarrak errematea sare barrura bidali du berdinketa jarrtzeko.

Mendilibarren taldeak nekea somatu du bigarren zatian eta Guardiolaren mutilek neurketaren kontrol osoa izan dute. 71. minutuan Sergi Robertok azken 1-2koa jarri du Nafarroako Erresumako markagailuan Asier Riesgo buruz burukoan gaindituta. Azkenengo minutuetan gol aukera argiena Leo Messik izan du, baina aldaratzea Osasunako defentsak kanpora bidali du. Partida eta kanporaketa blaugranek irabazi dute eta final-laurdenetan Mourinhoren taldearen aurka arituko dira.

- Fitxa teknikoa:

1 - Osasuna: Asier Riesgo; Marc Bertran, Lolo, Miguel Flaño, Satrustegui (Hermosa, 73. minutuan); Puñal, Raoul Loe; Cejudo (Postigo, 80. minutuan), Roberto Torres (Raul Garcia, 67. minutuan), Calleja; eta Lekic.

2 - Bartzelona: Pinto; Montoya, Pique, Fontas (Abidal, 14. minutuan), Adriano; Mascherano, Thiago, Sergi Roberto; Cuenca, Alexis (Messi, 58. minutuan) eta Pedro (Busquets, 70. minutuan).

Golak: 1-0, 41. minutuan: Lekic. 1-1, 49. minutuan: Alexis. 1-2, 72. minutuan: Sergi Roberto.