KOPAKO TXAPELDUNORDEAK
Osasunak 2005eko finaleko taldea omenduko du Realaren aurkako norgehiagokan
AGENTZIAK | EITB MEDIA
Javier Aguirrek zuzendu zituen jokalariak Sadarko berdegunean agertuko dira partida hasi aurretik, zale gorritxoen berotasuna jaso dezaten.
Osasunako jarraitzaileak Sada futbol-zelaian. Argazkia: EFE
Osasunak 2005eko Errege Kopako finala jokatu zuten jokalariak omenduko ditu ostiral honetan, Realaren aurka jokatuko duen derbiaren atarian.
Iruñeko klubak 2005eko ekainaren 11n Vicente Calderonen bildu ziren 20.000 zale gorritxoren aurrean Kopako txapeldunorde izan ziren hogei bat jokalari biltzea lortu du. Edizio hartan, Betisek bereganatu zuen garaikurra, luzapenean 2-1 irabazita.
Javier Aguirreren agindupean aritu ziren jokalari horiek ostiral honetako euskal derbiaren aurretik agertuko dira Sadarko berdegunean, zaleen berotasuna jasotzeko.
Honako jokalari hauek baieztatu dute aipatu ekitaldian parte hartuko dutela: Pablo Garcia, Patxi Puñal, Savo Milosevic, Ivan Rosado, Rafa Clavero, Pierre Webo, Juanma Ortiz, Carlos Cuellar, Quique Corrales, David Lopez, Unai Exposito, Juantxo Elia, Miguel Flaño, Gonzalo Eraso, Richard Sanzol, Josetxo Romero, Cesar Krutxaga, Valdo, Ludovic Delporte eta Moha.