Osasunak garaipen argia lortu du Chiclanan (0-5), eta Errege Kopako bigarren kanporaketarako sailkatu da

Osasuna 2024-25 denboraldiko Errege Kopako bigarren kanporaketarako sailkatu da, asteartean; izan ere, lehenengo kanporaketan, Chiclanako Udal Futbol Zelaian, Nafarroako taldeak 0-5 irabazi du. Raul Garciak bi gol sartu ditu, eta Iker Benitok, Jose Arnaizek eta Moi Gomezek bana; Osasunak bigarren zatian egin ditu bost golak.

Lehen zatian, Osasunak zelai erdia bereganatu du eta baloia hara eta hona mugitzen ahalegindu da; hori bai, Nafarroako taldeak ezin izan du arrisku handiegirik sortu Chiclanaren arean, etxekoak sendo aritu baitira atzealdean. Atsedenaldira joan baino pixka bat lehenago, burukada batean, Raul Garciak gorritxoen abagunerik argiena izan du. Lehen zatiaren azen jokaldian, Chiclanak buruz egindako beste erremate batean abagune ona izan du korner bat baliatuta gola egiteko.

Bigarren zatian, aldiz, Osasuna oso nagusi izan da, eta, gainera, berehala erakutsi du markagailuan nagusitasun hori. Raul Garciak sartu du 0-1ekoa, orpoz, Iker Benitoren jokaldi ederra baliatuz, eta Iker Benitok berak, penaltiz, 0-2koa egin du. 71. minutuan, Jose Arnaizek, buruz, 0-3koa jarri du, eta Moi Gomezek, 77.ean, laugarrena. Raul Garciak beste gol bat sartu du, 80. minutuan, emaitza biribildu eta kanporaketa erabat itxita.

Fitxa teknikoa

0 - Chiclana: Reguero; Samuel, David, Jaime, Benitez; Argudo (Pecci, 58. min), Caballero (Ramos, 68. min), Sergio (Natera, 75. min), Agustin; Mawi (Popi, 58. min), Dani (Pascual, 75. min).

5 - Osasuna: Aitor; Vidal, Unai Garcia, Herrando, Bretones (Cruz, 71. min); Moi Gomez, Muñoz (Osambela, 81. min), Ibañez (Martinez, 71. min), Benito (Barja, 58. min); Arnaiz eta Raul García de Haro.

Epailea: Hernandez Maeso (Extremadurako Batzordea). Chiclanako Argudo zigortu du, txartel horia aterata.

Golak: 0-1, 49. min: Raul Garcia. 0-2, 54. min: Benito, penaltiz. 0-3, 71. min: Arnaiz. 0-4, 77. min: Moi Gomez. 0-5, 80. min: Raul Garcia.