EA Sports Liga
Osasunak berdinketa lortu du Espanyolen etxean (0-0), eta sailkapeneko goialdean sendo jarraitzen du
EITB MEDIA
Nafarroako taldeak puntu bat lortu du RCDE Stadium futbol zelaian, Bartzelonan, gol aukera gutxi izan diren neurketa batean; Sergio Herrerak geldiketa oso ona egin du 78. minutuan, eta hori gakoa izan da berdinketa ziurtatzeko.
Pablo Ibañez, Pol Lozanoren aurretik, partidako jokaldi batean. Argazkia: EF.
Osasunak berdindu egin du, 0-0, Espanyolen aurka, RCDE Stadium futbol zelaian, 2024-25 denboraldiko EA Sports Ligako hamazazpigarren jardunaldian, larunbatean. Hala, Nafarroako taldeak 25 puntu ditu sailkapenean, 17 partida jokatuta, eta, behin-behinean, 6. postuan dago; Vicente Morenoren taldeak sailkapeneko goialdean sendo jarraitzen du, gol aukera gutxi izan diren neurketa jokatuta.
Espanyol-Osasuna (0-0): partidako laburpena
Osasunak puntua lortzeko funtsezkoa izan da Sergio Herrerak 78. minutuan egindako geldiketa bikaina; izan ere, Pol Lozano Espanyoleko jokalariak jaurtiketa ona egin du, baina atezain gorritxoa ezin hobeto aritu da, eta erantzun oso egokia eman dio. Horrela, Herrerak ziurtatu egin du puntu bat Vicente Morenoren taldearentzat.
Erremate hori alde batera utzita, nabarmentzeko moduko erasoko jokaldi gutxi izan dira, bereziki lehenengo zatian. Hori bai, Osasunak gaitasuna izan du beste behin golik ez jasotzeko, nahiz eta Espanyolek norgehiagokako azken txanpan presio handiagoa egin duen. Nafarroako taldeak lan ona egin du RCDE Stadiumeko berdegunean, eta saria izan du, gorritxoek puntu bat erdietsi baitute.
Osasunak larunbatean Sadarren Athleticen aurka jokatuko duen derbia du jada jomuga. 2024ko azkena izango da Iruñeko taldearentzat.
Fitxa teknikoa
0 - Espanyol: Joan Garcia; Tejero, Kumbulla, Cabrera, Brian Olivan; Pol Lozano, Kral, Romero (Justin, 86. min), Antoniu Roca (Cheddira, 60. min); Cardona (Milla, 74. min) eta Puado.
0 - Osasuna: Sergio Herrera; Areso (Nacho Vidal, 83. min), Catena, Boyomo, Bretones (Juan Cruz, 87. min); Ruben Garcia, Pablo Ibañez (Iker Muñoz, 67. min), Torro, Aimar Oroz (Kike Barja, 86. min); Budimir eta Raul Garcia (Ruben Peña, 67. min).
Epailea: Cordero Vega (Kantabriako Batzordekoa). Espanyoleko Pol Lozano, Tejero eta Kumbulla eta Osasunako Catena zigortu ditu, txartel horia aterata.
Nabarmentzekoa: 20.513 zale bildu dira RCDE Stadium futbol zelaian.