2019-2020 denboraldirako
Rubiales: 'Ligak ordutegi hauekin jarraitzen badu, konpetentzia berreskuratuko dugu'
Erredakzioa
Espainiako Futbol Federazioko presidentea den Luis Rubialesek adierazi du, Ligak ordutegi ero hauekin jarraitzen badu, federazioak ordutegiak jartzeko konpetentzia berreskuratuko duela.
Luis Rubiales, Espainiako Futbol Federazioko presidentea. Argazkia: EFE
Espainiako Futbol Federazioko presidentea den Luis Rubialesek Ligari jakinarazi dio, "horrelako ordutegi eroak" jartzen jarraitzen badu, "federazioak ordutegien konpetentzia berreskuratu" dezakeela 2019-2020 denboraldian.
"Ligak ordutegi ero hauek jartzen jarraitzen badu, partiden ordutegiak ezartzeko konpetentzia berreskuratuko dugu 2019-2020 denboraldirako. Federazioan kokoteraino gaude", adierazi du Rubialesek twitter sare sozialean, #RespetemosElFutbol hastaga gaineratuta.
Denboraldi honetan, Ligako partida batzuk ordutegi aldaketak izan dituzte; adibidez, 3. jardunaldiko Celta-Atletico Madril atzeratu egin zen 16:15etik 18:30era, eta 5. jardunaldiko Betis-Athletic neurketa 18:30etik 20:00etara atzeratu zen.
Tebasen erantzuna
Javier Tebas Ligako presidenteak, azkar erantzun dio Rubialesen kritikari: "Ezin daiteke berreskuratu norberarena ez dena".