Real Madrilek eta Bartzelonak finalerako txartela lortu nahi dute

Real Madrilek eta Bartzelonak Errege Kopako finalerako txartela izango dute jokoan asteazken honetan, 21:00etan, Santiago Bernabeun. Camp Noun jokatutako joaneko neurketa bana (1-1) berdinduta amaitu zen.

Santiago Solari Real Madrileko entrenatzaileak erabaki garrantzitsuak hartu beharko ditu beste behin. Gareth Balek keinu itsusia izan zuen Lucas Vazquez taldekidearekin Levanteren aurka galestarrak sartutako gola ospatzean. Gainera, Balek berotzeari utzi zion Ciutat de Valencia estadioan. Isco aulkian uzteko ez zuen beldurrik izan. Badirudi Gareth Balek ez duela Klasikoa hasieratik jokatuko. Lucas Vazquez da hasieratik jokatzeko aukera gehien dituena, eta Viniciusek jokatu behar duela argi dute Real Madrileko zale guztiek.

Barçaren aurkako partidan, Keylor Navas egongo da atean. Erdiko defentsak Varane eta Sergio Ramos izango dira; Carvajalek jokatuko du eskuin hegalean, eta zalantza da Marcelok ala Reguilonek jokatuko duen ezker hegalean. Reguilonek ditu Kopan hasieratik jokatzeko aukera gehien, eta litekeena da Marcelok asteburuko Barçaren kontrako Ligako partida jokatzea. Zelai erdian Casemiro, Modric eta Kroos egongo dira, Aurrealdean, Lucas Vazquezek ala Balek, Viniciusek eta Benzemak jokatuko dute.

Bestalde, Bartzelonak azken urteetan Kopan azaldu duen maila ona erakutsi nahi du, azken lau denboraldietan txapelduna izan baita. Messiren sasoi ona baliatzen saiatuko da Kataluniako taldea. Joaneko emaitza (1-1) irauli beharra dauka.

Ernesto Valverde entrenatzaileak lesionatuta egon diren Arthur Melo eta Cillessen deialdian sartu ditu, baina hamaikakoa nahiko argi dauka. Malcomek partida ona egin zuen joanekoan, baina badirudi ez duela hasieratik jokatuko. Ondorioz, Ter Stegen egongo da atepean. Semedok, Piquek, Lengletek eta Albak osatuko dute defentsako lerroa. Zelai erdian Busquets, Sergi Roberto eta Rakitic egongo dira. Dembelek, Suarezek eta Messik jokatuko dute aurrealdean.

Ustezko hamaikakoak:

Real Madril: Keylor Navas; Carvajal, Varane, Sergio Ramos, Reguilon; Casemiro, Kroos, Modric; Bale, Vinicius, Benzema.

Bartzelona: Ter Stegen; Semedo, Pique, Lenglet, Alba; Busquets, Sergi Roberto, Rakitic; Messi, Suarez, Dembele.

Epailea: Jose Maria Sanchez Martinez.

Estadioa: Santiago Bernabeu.

Ordua: 21:00etan.