Onena, hastear
Aste honetan Kopako finalerdiak erabakiko dira
Erredakzioa
Asteartean ezustea ematea helburu izango du Mirandesek Espanyolen aurka; asteazkenean Mallorcan jokatuko du Athleticek eta Camp Nou Barça-R. Madril jokatuko da. Ostegunean, Levante-Valentzia.
Athletic-Mallorca. Argazkia: EFE
Aste honetan erabakiko dira Errege Kopako finalerdiak final-laurdenetako itzuliko partidak jokatuko baitira.
Asteartean aurrenekoa jokatuko da. Mirandesek etxean hartuko du Espanyol eta ezustea ematea izango du helburu. Burgoseko taldeak partida ona jokatu zuen Bartzelonan eta markagailuan 0-2 aurreratu zen, baina Pochettinoren gizonek markagailuari buelta eman zioten azken minutuetan eta 3-2 nagusitu ziren.
Asteazkenean Athleticen txanda izango da. Zuri-gorriek Mallorcan jokatuko dute. Bielsaren taldeak kanporaketa bideratuta utzi zuen San Mameseko 2-0ekoarekin, baina bilbotarrak ez dira fio, Caparrosen taldeak Reala kanporatu baitzuen final-zortzirenetan (6-1).
Asteazkenean ere FC Bartzelona-Real Madril klasikoa izango da. Katalanek 1-2 irabazi zuten Santiago Bernabeun eta hurrengo kanporaketarako txartela eskura dute. Joanekoa amaitzean, "oso zaila" dutela aitortu zuen Mourinho zurien teknikariak.
Ostegunean Levante-Valentzia derbi valentziarra. Emeryren taldeak garaipen erraza lortu zuen joaneko norgehiagokan (1-4).