Irailaren 12an
San Mamesek hartuko du Athleticen eta Realaren arteko derbia
EITB MEDIA
Primera Iberdrola txapelketako bigarren jardunaldiko partida irailaren 12an jokatuko da, 12:00etatik aurrera.
Reale Arenan jokatutako Realaren eta Athleticen arteko derbia. Argazkia: EFE
San Mames estadioan jokatuko da Athletic Clubek eta Realak irailaren 12an jokatuko duten Primera Iberdrolako bigarren jardunaldiko euskal derbia, talde zuri-gorriak baieztatu duenez.
Partida 12:00etan hasiko da, eta, horrenbestez, Athleticen emakumezkoen taldea 'Katedralera' itzuliko da, 2020ko urtarrilaren 5ean Athleticek Bartzelona hartu eta hogei hilabetera, hain zuzen ere.
Koronabirusaren pandemiak eragindako osasun-murrizketen ondorioz, 15.900 lagunentzako edukiera mugatua izango du Bilboko futbol-zelaiak egun horretarako, LABIk astelehen honetan hartutako erabaki berrien arabera. Hori dela eta, Athleticek bazkideei eskatu die partida ikustera joateko asmoa izanez gero, webgune ofizialaren bidez izena eman dezatela.