Larunbatean, 20:00etan
Dena prest Bartzelona-Real Madril partidarako
Erredakzioa
Camp Nou zelaian jokatuko da ‘Klasikoa’ larunbat honetan (20:00etan). Madrileko taldeak lau puntuko abantaila du Barçarekiko sailkapenean. Aurkari biak Txapeldunen Ligan galtzetik datoz.
Özil (Real Madril) eta Puyol (Bartzelona) 'Klasiko' baten. Argazkia: EFE
Dena prest dago Camp Nou futbol zelaian jokatuko den Bartzelona-Real Madril partidarako. Larunbatean arratsaldeko 20:00etan hasiko da 'Klasikoa'.
Real Madril da BBVA Ligako liderra eta partida honetara Bartzelonarekiko lau puntuko abantailarekin iritsi da. Madrileko taldearen garaipenak eskura utziko die titulua merengeei. Bartzelonak irabaztekotan, puntu bakarrera kokatuko litzateke eta azken unera arte lehian ibili beharko dira bi taldeak. Berdinketa hobea da Real Madrilentzat puntu banaketarekin lau puntuko abantaila mantenduko bailuke Bartzelonarekiko denboraldia bukatzeko lau norgehiagoka geratzen direnean.
Aste erabakiorra eta gogorra da Bartzelona eta Real Madril bizitzen ari direna. Iragan astaerte eta asteazkenean Txapeldunen Ligako finalerdietako joaneko partidak jokatu zituzten eta biek porrot egin ere. Real Madrilek 2-1 galdu zuen Bayern Munichen aurka Alianz Arenan eta Bartzelonak 1-0 galdu zuen Chelsearen aurka Stamford Bridgen. Kanporaketak irauli beharra daukate, baina ‘Klasikoa’ dute bitarteko eta ezin Txapeldunen Ligan pentsatu.
Ustezko hamaikakoak:
FC Bartzelona: Valdes; Alves, Pique, Puyol, Adriano; Mascherano, Xavi, Busquets; Iniesta, Cuenca edo Alexis, eta Messi.
Real Madril: Casillas; Arbeloa, Sergio Ramos, Pepe, Marcelo; Xabi Alonso, Kedhira, Kaka, Di Maria; Cristiano Ronaldo eta Benzema.