KARGUTIK KANPO
Leeds Unitedek Javi Gracia kaleratu du
AGENTZIAK | EITB MEDIA
Entrenatzaile nafarra Ingalaterrako taldea salbatzeko asmoz heldu zen, baina bere gidaritzapean jokatutako 12 neurketatik hiru irabazi eta sei galdu ditu.
Javi Gracia. Argazkia: EFE.
Leeds Unitedek Javi Gracia nafarraren kaleratzearen berri eman du asteazken honetan, karguan hiru hilabete baino gutxiago egon ostean. Sam Allardycek zuzenduko du Ingalaterrako taldea denboraldiko azken lau partiduetan.
Gracia taldea salbatzeko asmoz iritsi zen Leedsera, eta, nahiz eta kluba jaitsiera postuetatik kanpo egon, bere gidaritzapean jokatutako 12 neuketetatik hiru baino ez ditu irabazi, eta sei galdu ditu. Gainera, Premier League txapelketan hilabete natural batean gol gehien jaso dituen taldea izan da apirilean. Izan ere, gol zaparradak jaso ditu Arsenalen (4-1), Liverpoolen (1-6), Crystal Palaceren (5-1) eta Bounemouthen aurka (4-1).
Gracia bigarrenez aritu da Premier Leaguen entrenatzaile gisa, 2018ko urtarriletik 2019ko irailera arte Watford zuzendu baitzuen, eta FA Cupeko finalera iritsi zen orduan.
Leeds sailkapeneko hamazazpigarren tokian dago, 30 punturekin, jaitsiera postuetan dagoen Nottingham Forestekin berdinduta, baina haiek gol gehiago dituzte kontra. Graciaren talde ohiak Manchester City, Newcastle United, West Ham United eta Tottenham Hotspur izango ditu aurkari ligaren azken txanpan.