RUBIALES AUZIA
FIFAk diziplinazko prozedura abiatu du Luis Rubialesen kontra
AGENTZIAK | EITB MEDIA
Hermosori emandako musuak eta tituluaren ospakizunean izandako jarrerek FIFAren Diziplina Kodeko 13.1 eta 13.2 artikuluak urra ditzaketeela gaineratu du.
Luis Rubiales (erdian), Ceferinekin (ezkerrean) eta Infantinorekin (eskuinean), FIFAko presidentea
FIFAren Diziplina Batzordeak ostegun honetan iragarri duenez, diziplina prozedura jarri du martxan Luis Rubiales Espainiako Futbol Federazioko presidentearen aurka, Emakumeen Mundu Txapelketaren finalean Jenni Hermoso jokalariari domina-banaketan ezpainetan emandako musuaren harira.
Erakundeak ohar batean aurreratutakoaren arabera, "FIFAren Diziplina Batzordeak Luis Rubiales Espainiako Futbol Federazioko presidenteari jakinazio dio diziplina prozedura abiatu duela haren kontra, 2023ko abuztuaren 20an jokatutako Emakumeen Munduko Koparen finalean gertatutakoa dela eta".
Hermosori emandako musuak eta tituluaren ospakizunean izandako jarrerek FIFAren Diziplina Kodeko 13.1 eta 13.2 artikuluak urra ditzaketeela gaineratu du.
Horrez gain, pertsona guztien osotasuna errespetatzeko konpromisoa berretsi du erakundeak. "Horrexegatik, horren aurkako edozein jokabide irmo salatu du", amaitu du FIFAk agiria.
Gianni Infantinok gidatzen duen antolakuntza horren erabakiak bat egin du Rubialesen aurka ekiteko eskatu duten gainerako ahotsekin, Jenni Hermoso bera barne. Izan ere, Espainiako selekzioko jokalariak "neurri eredugarriak" har ditzan eskatu dio federazioari. Jokin Aperribay Realeko presidenteak ere "Rubialesek dimisioa eman" beharko lukeela uste du.