LEHEN MAILARA IGOERA
Espanyol Lehen Mailara itzuli da, Oviedori 2-0 irabazita play-offeko itzuliko partidan
Agentziak | EITB MEDIA
Kataluniako taldeak buelta eman dio joaneko partidako emaitza negatiboari (1-0) Javi Puadoren bi golei esker, eta maila gorenera itzuliko da urtebete geroago.
Espanyoleko jokalariak gol bat ospatzen. Argazkia: EFE
Espanyol Lehen Mailara itzuliko da berriz, igande honetan Stage Front Stadiumean Oviedo 2-0 mendean hartu ondoren. Kataluniako taldeak buelta eman dio joaneko partidako emaitza negatiboari (1-0) Javi Puadoren bi golei esker, eta maila gorenera itzuliko da urtebete geroago.
Neurketaren lehen minutuak jokoa aztertzeko izan dira. Espanyolek jabetza izan du eta zuloak, diagonalak eta baloi luzeren bat bilatzen saiatu da Oviedori min egiteko. Asturiarrek, joanekoan lortutako abantailarekin, ez dute arriskurik sortu goian.
Manolo Gonzalezenak tematuta zeuden. Nico Melameden erremate behartu batekin abisatu dute, baina Puado izan da, 44. minutuan, bere defentsatik ihes egin ondoren, markagailua ireki duena (1-0).
Espanyolek ezustean harrapatu du Oviedo, eta atsedenaldia baino lehen abantaila handitzeko aprobetxatu du momentua. Puadok, berriz ere, bizkarra hartu dio Seoaneri eta 2-0ekoa jarri du markagailuan.
Bigarren zatian, Oviedoren gola sartzeko presak partida irekiagoa bilakatu du eta Espanyol oso eroso ibili da abantaila handitzeko aukeren zain.
77. minutuan, Borja Bastonek penaltia eskatu du, baina epaileak ez dio arrazoia eman. Asturiarren indarrak luzapenera arte iraun du, eta Borja Bastonek beldurra sartu die aurkariei azken uneko errematearekin.
Azkenean, markagailua ez da mugitu eta Espanyolek Lehen Mailan jokatuko du berriro.
Fitxa teknikoa:
2 - Espanyol: Joan Garcia; Omar El Hilali, Calero, Cabrera, Pere Milla (Olivan, 67. min); Jofe Carreras (Sanchez, 79. min), Keidi Bare (Victor Ruiz, 79. min), Gragera, Nico Melamed (Aguado, 79. min); Puado (Pol Lozano, 87. min) eta Braithwaite.
0 - Oviedo: Leo Roman; Viti, Luengo, Dani Calvo, Pomares (Abel Bretones, 46. min); Luismi (Cazorla, 63. min), Colombatto; Dubasin (Masca, 63. min), Seoane (Borja Baston, 76. min), Sebas Moyano (Borja Sanchez, 46. min) eta Alemao.
Golak: 1-0, 44. min: Puado. 2-0, 47+. min: Puado.
Epailea: Cordero Vega. Txartel horia atera die Cabrera (21. min), Sebas Moyano (29. min), Viti (41. min), Keidi Bare (47+. min), Pere Milla (64. min) eta Seoane (74. min) jokalariei.