Ez du klubean jarraituko
West Hamek Julen Lopetegui kargugabetu du
EITB MEDIA
Londreseko taldea, Premier Leagueko hogei jardunaldi jokatuta, sailkapeneko hamalaugarren postuan dabil. Ingalaterrako klubak 2024ko maiatzean fitxatu zuen Asteasuko entrenatzailea, baina West Hamek izandako emaitzak ez dira onak izan.
Julen Lopetegui, artxiboko irudian. Argazkia: EFE.
West Ham Unitedek Julen Lopetegui kargugabetu du, eta, horrenbestez, asteasuarrak Londreseko taldeko entrenatzailea izateari utzi dio, asteazkenean Ingalaterrako klubak iragarri duenez. West Ham, Premier Leagueko hogei jardunaldi jokatuta, sailkapeneko hamalaugarren postuan dabil; 2024ko maiatzean fitxatu zuen Gipuzkoako entrenatzailea, baina emaitzak ez dira onak izan.
"2024-25 denboraldiko lehen zatian, emaitzek ez dute bat egin klubak dituen helburuekin; hortaz, esku hartu dugu, helburu horiekin lerrokatuta", adierazi du West Hamek, bere web orrian argitaratutako agiri ofizialean.
Erresuma Batuko hiriburuko klubak ez du zehaztu nork hartuko duen entrenatzaile gipuzkoarrak utzitako kargua; hala ere, West Hamek egun batzuk daramatza Graham Potterrekin negoziatzen. Azken hori, besteak beste, Brightonen eta Chelsean ibilitakoa da.