Dani Diazek Realarekin berritu du, 2029ra arte

Dani Diazek Realarekin 2028-2029 denboraldiaren amaieraraino berritu du, Gipuzkoako taldeak astelehen honetan jakinarazi duenaren arabera; 19 urteko jokalariak 2026-2027 denboraldiaren amaieraraino zeukan kontratua talde txuri-urdinarekin, eta, orain, bi denboraldiz luzatu du kontratua.

Azkeneko hilabetean, Sanseko laugarren berritzea da, Orobengoa, Carbonell eta Jon Baldaren ostean. Dani Diaz 2020ko udan ailegatu zen Zubietara Racing Santander taldearen harrobitik; orain, Zubietan bost denboraldiren ondoren eta belaunean izandako lesio larri baten ostean, Ion Ansotegiren esanetara dago, profesional mailan ematen ari den lehenengo denboraldian. Aurreko denboraldian egin zuen lehenengo taldearekin debuta, Ligako partida batean, Valladoliden aurka, Anoetan.

Denboraldi honetan, zortzi partida jokatu ditu; horietatik hirutan hasieratik atera da zelaira. Jokalari gazteak aldaketa eskatu behar izan zuen ostiralean, Racingen aurkako Ligako partidan; zorionez, ez du lesiorik egin, eta asteazkeneko partidurako prest egonen da, Huescaren aurka.