Realak porrot mingarria jaso du Celtaren aurka

Realak 2-3 galdu du Celtaren aurka Anoetan. Porrota mingarria izan da txuri-urdinentzat, izan ere, galiziarren hirugarren gola 88. minutuan etorri baita. David Moyesek zuzentzen duen taldeak norgehiagoka ona jokatu du, baita Celtak ere, eta azkenean, Galiziako taldea atera da garaile.

Lehen zatiak erritmo bizia izan du. Lehen hamar minutuetan talde bakoitzak gola sartzeko abagune bana izan du, baina Velaren burukada gutxigatik kanpora joan da, eta Nolitoren jaurtiketari erantzun ona eman dio Rulli atezainak. Ondoren, Celta baloiaren jabe egiten hasi da, baina hamaikagarren minutuan, Zurutuzak erdiraketa bikaina egin eta Agirretxek sare barrura bidali du errematea (1-0).

Gola sartu ostean, Velak Realaren bigarrena egiteko aukera izan du, baina bere jaurtiketa zutoina urratuz kanpora joan da. Talde txuri-urdina nagusi izan da lehen gola sartu ostean eta Celta unerik txarrenak pasatzen ibili denean, Galiziako taldeak banakoa (1-1) egitea lortu du, 17. minutuan. Radojak area kanpotik indarge jaurti, Iago Aspasek baloia ukitu eta Rulli gainditu du.

Celtaren golaren ondoren, norgehiagoka asko parekatu da. Bi taldeetako bat ere ez da abagune argiak sortzeko gai izan 37. minutura arte. Orduan, Yurik hegaletik jokaldi bikaina egin, pase dotorea sartu du areara eta Agirretxek baloia sare barrura bultzatu du 2-1ekoa eginez. Gainera, azken minutuan, Iñigo Martinezek baloia area barruan jaso, errematea egin eta Sergio Celtako atezainak txuri-urdinen gola eragotzi du. Horrenbestez, etxeko taldearen aldeko 2-1eko emaitzarekin iritsi da partida atsedenaldira.

Bigarren zatiaren hasieran Celta berdinketaren bila atera da, eta Berizzok zuzentzen duen taldeak 55. minutuan saria jaso du. Wassek erdiraketa bikaina atera eta Iago Aspasek binakoa (2-2) egin du. Celtaren golaren ostean, Realaren erantzuna etorri da, baina Sergio atezainak txuri-urdinen gola eragotzi du Yuriren jaurtiketa indartsua desbideratuta. Hortik minutu gutxira, Celtak abagune ezin hobea izan du, baina Nolito Rulli atezainaren aurrean bakarrik geratzeko zorian egon denean, Iñigo Martinez lurrera bota da, eta Celtaren gola eragotzi du.

Azken minutuetan bi taldeek garaipenaren bila jo dute, eta abagune argiak izan dituzte, batik bat Celtak. 78. minutuan Iago Aspasen errematea kanpora joan da, jarraian Realak izan du aukera Brumaren bitartez, baina jokaldi ona egin ostean, bere errematea oso desbideratuta kanpora joan da. Abagune argiena Celtak izan du 85. minutuan, baina Giudettik ate aurrean huts egitea ezinezkoa zirudien errematea langa gainetik kanpora bidali du.

Bi taldeetako batek ere ez duela gola sartuko ematen izan duenean, Pablo Hernandezek area kanpotik jaurtiketa bikaina atera eta gol ikusgarria sartu du Celtarentzat (2-3). Galiziarren hirugarren gola 89. minutuan etorri da, eta Realari ez dio berdinketa lortzen saiatzeko denborarik eman. Azkenean, hiru puntuak Celtak eraman ditu Anoetatik eta Realak porrota jaso du.

Fitxa teknikoa:

2 - Reala: Rulli; Zaldua, Mikel González, Iñigo Martínez, Yuri; Illarramendi, Bergara (Chory Castro, 89. min), Zurutuza (Bruma, 56. min); Xabi Prieto, Agirretxe (Jonathas, 84. min) eta Vela.

3 - Celta: Sergio; Hugo Mallo, Sergi Gomez, Fontas, Jonny; Radoja, Wass, Pablo Hernandez; Nolito (Planas, 90. min), Orellana (Madina, 89. min) eta Aspas (Guidetti, m.82).

Golak: 1-0, 11. min: Agirretxe. 1-1, 17. in: Aspas. 2-1, 37. min: Agirretxe. 2-2, 55. min: Aspas. 2-3, 89. min: Pablo Hernández.

Epailea: Fernandez Borbalan.

n.