Joseba Llorente: 'Reala aurrera pausua da nire kirol-ibilbidean'

Realak gaur Joseba Llorente aurrelaria aurkeztu du Anoeta. Datozen lau denboraldietarako lan hitzarmena sinatu du eta bere aurkezpenean, "aurrera pausutzat" jo du bere erronka berria.

Realera itzultzeko "gogoak" aukera egiteko erabakigarriak izan direla esan du Vila-Realeko jokalari ohiak bere aurkezpen ofizialean. Batere buru hausterik gabe hartutako erabakia izan dela aitortu du hondarribitarrak eta Realean jokatzea "erronka handia" dela gaineratu.

Zubietatik atzeko atetik irten zenetik asko aldatu dela esan du. "Helduagoa naiz orain eta eskarmentu handia daukat", adierazi du. Hala ere, ez du bere burua talde donostiarraren izar bezala ikusten. "Ez naiz izango taldeko izarra. Taldea bera da izar nagusia eta ez jokalariak".

Aperribai Realeko presidentea pozik agertu da Llorenteren fitxaketarekin. "Aldagela ezin hobeto ezagutzen du eta bere etxean sentituko da hasiera-hasieratik", esan du.