Bartzelona-Reala (5-0): Merezitako jipoia

Realak ezin izan du Bartzelona indartsuarekin eta 5-0eko jipoia jaso du. Villak lehen zatiko 7. minutuan lortu duen gola erabakigarria izan da, katalanei partida aldapa behera jartzeko. Lasarteren mutilek ia ez dute gol aukerarik sortu norgehiagoka osoan.

Donostiarrek ondo hasi dute norgehiagoka Bartzelona ezustean harrapatuz eta Victor Valdesen ate ingurura arriskua eramanez. Hala ere, Reala une onenean zegoelarik katalanek 1-0ekoa lortu dute Villaren golari esker. Realeko defentsak akatsa egin du Villa area txikian bakarrik utziz eta Pedrok pase ederra jarri dio asturiarrari partidako 8. minutuan.

1-0ekoarekin Guardiolaren mutilak eroso jokatu dute eta partidaren kontrola etxekoek hartu dute. Txuri-urdinak baloiaren atzetik egon dira eta ezin izan dute jabetza berreskuratu. 10. minutuan Pedrok bigarrena sartzeko aukera ona izan du, baina kanariarrak kanpora bidali du bere jaurtiketa. Blaugranek arrisku handia eraman dute Claudio Bravoren ate ingurura eta 2-0ekoa Iniestak lortu du lehen zatiko 32. minutuan. Atsedenaldira etxekoek norgehiagokaren kontrol osoa eraman dute.

Bigarren zatia hasi bezain laster Messik 3-0ekoa lortu du Dani Alvesekin eginiko jokaldi paregabe bati esker. Martin Lasarteren mutilek lerroak aurreratzen saiatu dira, baina Bartzelonaren nagusitasunak argiegia izaten jarraitu du eta txuri-urdinek ez dute baloiaren jabetza mantendu. Realeko entrenatzaileak Zurutuza sartu du zelaian freskotasuna emateko, baina Guardiolaren taldeak ez du kontraerasoa sortzeko aukerarik utzi.

Blaugranek jokoaren erritmoa moteldu dute hiru goleko abantailarekin eta partida lasaitu dute. Hala ere, gipuzkoarrek ez dute gol aukerarik sortu ia partidu osoan. Messik laugarrena sartzeko aukera izan du bere oinetan, baina bere zartakoa zutoinera joan da norgehiagokaren 78. minutuan. Bigarren zatiko 86. minutuan aurrelari argentinarrak 4-0ekoa jarri du bakarkako jokaldi eder baten ondoren. Bojanek azken 5-0ekoa jarri du 90. minutuan partidaren emaitza erabakiz.

- Fitxa tekinikoa:

5 - FC Bartzelona: Valdes; Alves, Puyol, Abidal, Maxwell; Mascherano (Busquets, m.52), Xavi (Keita, m.67), Iniesta; Pedro (Bojan, m.61), Messi eta Villa.

0 - Real Sociedad: Bravo; Carlos Martinez, Ansotegi, Mikel Gonzalez, De la Bella; Rivas, Elustondo, Aranburu (Zurutuza, m.56); Xabi Prieto (Sarpong, m.80), Griezmann eta Joseba Llorente (Tamudo, m.69)

Golak: 1-0, m.9: Villa. 2-0, m.33: Iniesta. 3-0, m.46: Messi. 4-0, m.87: Messi. 5-0, m.90: Bojan.