Valentzia-Reala, (3-0): Porrota eta arazoak txuri-urdinentzat

Realak merezitako porrota jaso du Mestallan Valentziaren aurka eta talde txuri-urdinak maila ez galtzeko borrokan jarraitu beharko du. Valentziak 3-0 irabazi dio Realari.

Martin Lasartek zuzentzen duen taldeak lehen zati txarra jokatu du eta Valentziak ez du barkatu. Lehen 45 minutuetan zehar Reala baloiaren atzetik aritu da une oro. Unai Emeryren taldea zen nagusi eta saria lortu du 18. minutuan. Soldadok Matak emandako pase dotorea sare barrura bultzatu du 1-0ekoa egiteko. Golak indarra eman dio Valentziari nahiz eta Realak aukera hirukoitza izan duen 22. minutuan. Griezmannen jaurtiketa Guaitak desbideratu du, ondoren Aranbururen errematea atepetik atera du defentsa batek eta Tamudoren azken errematea langa gainetik kanpora joan da.

Realaren aukera on horren ostean Valentziak beste bi gol sartu ditu. 26. minutuan Jonasek sare barrura bidali du buruz eginiko errematea Miguelen erdiraketa errematatuz eta 2-0koa ezarridu. Hamabi minutu beranduago, 38. minutuan Soldadok 3-0koa igo du markagailura Mathieuren erdiraketa buruz errematatuta. Atsedenaldira 3-0ko emaitzarekin iritsi da partida.

Bigarren zatian Realak erreakzio txikia izan du, baina ez da nahikoa izan Valentzia arazoetan jartzeko. Unai Emeryren taldeak ondo kontrolatu du norgehiagoka eta ez du arazo gehiegirik izan defentsa lanean. Griezmann izan da gehien saiatu dena urrutiko jaurtiketen bitartez, baina ez du asmatu.

Azkenean, Realak 3-0ko emaitzarekin galdu du eta Martin Lasartek zuzentzen duen taldeak salbaziogatik borrokatzen jarraitu beharko du.

Fitxa teknikoa:

Valentzia:Guaita; Miguel, Dealbert, R. Costa, Mathieu, Albelda (80'' Topal),Banega, Joaquin (62'' Pablo Hernández), Jonas, Mata eta Soldado (62''Aduriz).

Reala: Bravo; Martinez (45'' Dela Bella), Demidov, Mikel, Estrada, Markel, Aranburu (60'' Elustondo),X.Prieto, Zurutuza, Griezmann eta Tamudo (66'' Ifran).

Golak: 1-0. Min 18. Soldado. 2-0. Min 26. Jonas. 3-0. Min 38. Soldado.