Sangalli, kirofanora
Illarramendi berriro lesionatu da eta agur esan dio denboraldiari
Erredakzioa
Realeko erdilariak II. graduko lesioa du ezker aldakako muskulu abduktore luzean. Bestalde, Sangalliri ebakuntza egingo diotela jakinarazi du klubak.
Asier Illarramendi eta Mikel Oyarzabal, Realaren entrenamendu baten. Argazkia: EFE
Asier Illarramendi berriz lesionatu da, eta agur esan dio denboraldiari. Astelehenean Realak Zubietan egin zuen entrenamenduan min hartu zuen erdilari txuri-urdinak, eta ez du denboraldi honetan gehiago jokatzerik izango.
Realak jakinarazi duenez, Illarramendik "II. graduko lesioa du ezker aldakako muskulu abduktore luzean. Fisioterapia bidezko tratamenduarekin hasi da. Pixkanaka itzuliko da ohiko jarduerara, eta prozesuaren bilakaerak baldintzatuko du". Mutrikuko erdilariak belauneko lesio larria izan zuen Ligaren hasieran, baina taldekideekin batera entrenatzen ari zen, erritmo onean. Orain, beste lesio bat sendatzeko prozesuari ekin beharko dio.
Bestalde, klubak iragarri du Luca Sangallik ezegonkortasun handia duela ezkerreko belaunezurrean. Azterketen emaitzak ikusita, ebakuntza kirurgikoa egingo diote datozen egunetan (data zehazteke dago).