Gemma Gilik kontratua berritu du Realarekin, 2023ra arte

Gemma Gilik kontratua berritu du Realarekin 2023ko ekainaren 30era arte, klubak ostegun honetan jakinarazi duenez. Jokalariak urtebetez luzatu du talde txuri-urdinarekin zuen lotura, aurreko kontratua denboraldi honen (2021-2022) bukaeran amaitzen baitzitzaion.

Gilik hirugarren urtea beteko du talde txuri-urdinarekin datorren denboraldian, eta pozik azaldu da kontratu berria sinatu ostean: "Hemen egon nahi dut, oso gustura nago, jokatzen ere asko disfrutatzen ari naiz eta horregatik jarraitu nahi dut", adierazi du.