Akordioa
Realak eta Getafek Porturen lagapena adostu dute, urtebeterako eta erosketa-aukerarekin
EITB MEDIA
Jokalariak hiru urte eman ditu Donostian; 137 partida jokatu ditu eta 18 gol sartu. Gainera, 2019-20 denboraldiko Kopako titulua bereganatu du.
Portu, aurrealdean, eta Imanol, artxiboko irudian. Argazkia: EFE.
Astearte honetan ofizial egin dutenez, Realak eta Getafek Portu jokalariaren lagapena adostu eta itxi dute, urtebeterako eta erosketa-aukerarekin. Murtziarrak, hala, Donostian izandako hiru urteko ibilbideari amaiera eman dio; guztira, 137 partida jokatu ditu elastiko txuri-urdina jantzita, eta 18 gol sartu. 2019-20 denboraldiko Kopa irabazi zuen, Athleticen aurka, 2021eko apirilaren 3an izandako finalean; final horretan, Portuk parte-hartze erabakigarria izan zuen, kontuan izanik berak behartu zuela Realari garaipena eman zion penaltia.
Cristian Portuguesek, Portuk, gutxiago jokatu du 2021-22 denboraldian, ez aurrekoetan beste minutu, eta, azkenean, beste talde batera joateko apustua egin du; hala, Quique Sanchez Floresek zuzentzen duen taldeko zelai-erdia indartuko du.
Girona taldean eta Donostian emandako urteei erreparatuta, Portuk 211 partida ofizial daramatza, Lehen Mailan, Europa Ligan eta Kopan. Orain arte, 39 gol sartu ditu, ibilbide horretan.