Beckerrek barkamena eskatu du, Donostiako diskoteka batean liskarra izan ostean

Sheraldo Becker Realeko aurrelariak barkamena eskatu du publikoki, bart Donostiako diskoteka baten kanpoaldean liskarra izan eta gero.

Istiluaren irudiak sare sozialetan zabaldu dira. Bideo horretan, Realeko jokalaria oldarkor ageri da, eta inguruan dituen zenbait lagun hura lasaitzeko ahaleginetan ikus daitezke.

Gaur, Beckerrek mezua argitaratu du bere sare sozialetan, barkamena eskatuz eta gertakariak azaldu nahian. Haren esanetan, bere emaztea eta senideak "defendatzen" saiatu zen.

Emandako irudiaz harro ez dagoela esan du. "Horregatik, barkamena eskatzen dizuet; huts egin dut", adierazi du. Ildo horretan, gertakari horren aurrean "klubak hartu dezakeen edozein erabaki" onartuko duela erantsi du.  

Eta honela bukatu du bere oharra: "Une honetan, zuekin guztiokin zorretan nago, presidentearekin, zuzendaritzarekin, entrenatzailearekin eta nire taldekideekin. Inoiz baino gehiago ahaleginduko naiz gure helburuak lortzeko. Sentitzen dut".