Gazpromen aurkako pankarta
UEFAk espedientea ireki dio Baseli
Erredakzioa
Greenpeaceko aktibistek pankarta handi bat atera zuten Txapeldunen Ligako eta Schalke 04ren babeslea den energia enpresaren aurka, eta partida gelditu egin behar izan zen.
Greenpeaceko aktibistek Gazpromen aurka St. Jakob-Parken atera zuten pankarta. Argazkia: EFE
UEFAk espedientea ireki dio Basel taldeari Schalke 04ren aurka jokatutako partidan eman ziren gertakariengatik. Laugarren minutuan partida eten egin behar izan zen Greenpeaceko aktibistek atera zuten pankarta baten eraginez.
Baselen eta Schalkeren arteko norgehiagokako laugarren minutuan, partida eten egin behar izan zuen epaileak. Greenpeaceko aktibistek Gazprom energia enpresa errusiarraren aurkako pankarta erraldoi bat atera zuten St. Jakob-Park zelaiaren teilatutik. Gazprom Txapeldunen Ligako babesle ofiziala da, eta Schalke 04 ere babesten du.
Baselek antolakuntzan akatsak izan dituela esaten du UEFAk eta espedientea ireki diote talde suitzarrari. Kasua UEFAren Diziplina Batzordeak aztertuko du, urriaren 17an.