Bartzelonarentzat mezua?
Mourinhoen ustez beste talde handi batzuk multzo errazagoak dituzte
Erredakzioa
Real Madrileko entrenatzaileak esan du "Europako beste talde handi batzuk zorte gehiago dute eta interneten begiratu behar izan dut beraien aurkariak zein herrialdetakoak diren".
Jose Mourinho Real Madrileko entrenatzailea. Argazkia: EFE
Real Madrilek 4-0 irabazi zion Olympique Lyoni asteartean Bernabeun jokatu zen Txapeldunen Ligako partida. Golak eta joko ona erakutsi zuen Real Madrilek, baina Jose Mourinho entrenatzaileak horrez gain, mezu bat uzti zien Europako beste talde handi batzuei.
Mourinho Bartzelonaren edo Manchester Uniteden izena esan gabe, esaldi hau esan zuen: "Gure multzoan Frantziako eta Holandako talde on bana daude eta Kroaziako Ligako txapelduna ere. Europako beste talde handi batzuk noren aurka jokatzen duten jakiteko interneten begiratu behar izan dut aurkariak zein herrialdetakoak diren".
"Gure multzoa ez da erraza eta lan ona egiten ari gara. Lyon ez da aurkari erraza. Real Madrilek beraien aurka jokatu dituen zortzi aldietatik behin irabazi zuen. Ghaur erraza izan da lehen minututik ondo jokatu dugulako", gaineratu zuen Real Madrileko entrenatzaileak.
Benzema sartu zuen Mourinhok hasierako hamaikakoan Higuain sartu beharrean eta horren inguruko galderari honela erantzun zion: "Beti saiatzen naiz zer nolako partida izango den imajinatzen eta askotan erratu egiten naiz. Aurkariaren defentsa ahula espero nuen, defentsa atzeratua eta lerroen artean espazio gutxirekin".
Aurrelarien inguruko eztabaidarekin bukatzeko hau esan zuen 'Mou'k: "Eztabaidak jarrai dezala".