Chelseak Camp Nou estadioan eutsi eta finalerako txartela lortu du

Fitxa teknikoa:

2 - Bartzelona: Valdes; Puyol, Pique (Alves, 26. minutuan), Mascherano; Busquets, Xavi, Iniesta, Cesc (Keita, 74. minutuan); Cuenca (Tello, 67. minutuan), Alexis eta Messi.

2 - Chelsea: Cech; Ivanovic, Cahill (Bosingwa, 12. minutuan), Terry, Cole, Mikel, Meireles, Mata (Kalou, 58. minutuan), Lampard, Ramires; eta Drogba (Torres, 80. minutuan).

Golak: 1-0, 35. minutuan: Busquets. 2-0, 44. minutuan: Iniesta. 2-1, 45+1. minutuan: Ramires. 2-2, 90+2. minutuan: Torres.

Chelseak Txapeldunen Ligako finalerako txartela eskuratu du Bartzelonaren aurka 2-2 geldituta. Stamford Bridgen 1-0 irabazi zuen Londreseko taldeak eta Camp Nou estadioan gogor eutsi dio sailkapena lortzeko. Busquetsek eta Iniestak markagailuan 2-0 goitik jarri dute Bartzelona, baina Ramiresek 2-1ekoa lortu du atsedenaldiaren aurretik. Messik penalti bat huts egin du atsedenaldiaren ostean, eta Torresek azken 2-2koa jarri du norgehiagokako azkenengo minutuan.

Aurreneko minututik, partidaren kontrola hartu dute Guardiolaren mutilek eta Chelsea defentsan ederki itxi da. Hala ere, Bartzelonak gol aukera bikainak sortu ditu. Messik 3. minutuan Cech gainditzeko abagune ona izan du, baina argentinarrak kanpora bidali du baloia. 19. minutuan Cech atezainak gelditu ikusgarria egin dio Leo Messiri, oinaz, baina blaugranek erasoan sakatzen jarraitu dute.

Sergio Busquetsek eskuratu du Bartzelonaren aurreneko gola, 35. minutuan. Cuencak pase bikaina eman dio erdilariari eta horrek sareetara bidali du baloia, markagailuan 1-0ekoa jartzeko. Jarraian, John Terryk txartel gorria ikusi du Alexis Sanchezi belaunaz bizkarrean kolpe gogorra emateagatik eta Chelsea hamar jokalarirekin gelditu da. 43. minutuan, Iniestak 2-0ekoa lortu du Cech atezaina ederki gaindituta. Hala ere, atsedenaldia heldu aurretik Ramiresek gol ikusgarria lortu du eta Londreseko taldeak 2-1ekoa jarri du Camp Nou estadioko markagailuan.

Atsedenaldiaren ostean, Drogbak Cesci penaltia egin diola adierazi du epaileak, baina Messik langara bidali du jaurtiketa. Alexis txiletarrak abagune bikaina izan du 53. minutuan eta errematea gutxigatik bidali du kanpora. Cuencak ere aukera ederra izan du, baina Cechek ondo desbideratu du baloia.

Chelsea gogor aritu da defentsan, emaitzari eusteko, eta Guardiolaren mutilek ezin izan dute hirugarren gola lortu. Messik jaurtiketa bat zutoinera bidali du 82. minutuan, baina blaugranek ez dute aukera gehiagorik sortu. Norgehiagokako azkenengo minutuan, Fernando Torresek 2-2koa jarri du markagailuan, kontraeraso batean Valdes gaindituta gero.