Bayernek jokatuko du Txapeldunen Ligako finala, Chelsearen aurka

Fitxa teknikoa:

2 - Real Madril: Casillas; Arbeloa, Pepe, Sergio Ramos, Marcelo; Khedira, Xabi Alonso; Di Maria (Kaka 74. minutuan), Ozil (Granero, 111. minutuan), Cristiano Ronaldo; eta Benzema (Higuain, 106. minutuan ).

1 - Bayern: Neuer; Lahm, Boateng, Badstuber, Alaba; Luiz Gustavo, Schweinsteiger; Robben, Kroos, Ribery (Müller, 95. minutuan); eta Mario Gomez.

Golak: 1-0, 6. minutuan: Cristiano Ronaldok, penaltiz. 2-0, 14. minutuan: Cristiano Ronaldo. 2-1, 27. minutuan: Robbenek, penaltiz.

Penaltiak: 0-1: Alaba. 0-1: Cristiano. Neuerrek gelditua. 0-2: Mario Gomez. 0-2: Kaka. Neuerrek gelditua. 0-2: Kroosek, Casillasek gelditua, 1-2: Xabi Alonso. 1-2: Lahmek, Casillasek gelditua. 1-2: Sergio Ramosek kanpora. 1-3: Schweinsteiger.

Bayernek eta Chelseak jokatuko dute Txapeldunen Ligako finala. Heynckesen mutilek Real Madril finaletik at utzi dute Santiago Bernabeu estadioan penaltietan irabazita. Itzulerako neurketa joanekoaren emaitza berberarekin bukatu da (2-1) eta kanporaketa penaltietan erabaki da. Sergio Ramosek jaurtiketa erabakigarria huts egin du eta Schweinsteigerrek sailkatzea eman dio Bayerni.

Partidaren aurreneko minutuetan Mourinhoren mutilek erasoan sakatu egin dute eta Neuerrek gelditu erabakigarria egin du Khediraren jaurtiketa desbideratuta. Epaileak Real Madrilen aldeko penaltia adierazi du 5. minutuan Alabak eskuarekin baloia jotzeagatik, eta Cristiano Ronaldok 1-0ekoa jarri du markagailuan. Heynckesen mutilek berdinketa lortzeko abagune argia izan dute, baina Robbenek kanpora bidali du saiakera.

Norgehiagokako 14. minutuan, Cristiano Ronaldok 2-0ekoa jarri du Santiago Bernabeu estadioko markagailuan eta talde zuriak abantaila polita hartu du. Hala ere, Pepek Mario Gomez zangotrabatu du area barnean eta Arjen Robbenek 2-1ekoa lortu du, penaltiz. Real Madrilek gola sartzeko abagune ederra izan du 30. minutuan, baina Benzemaren jaurtiketa gutxigatik joan da kanpora. Lehenengo zatiko azkeneko aukera argia Robben holandarrak izan du, baina Casillasek ederki desbideratu du falta jaurtiketa.

Atsedenaldiaren ostean Mario Gomezek norgehiagoka berdintzeko abagune paregabea izan du, baina aurrelariak kanpora bidali du errematea oso gutxigatik. Real Madrilen erantzuna Benzemak eman du 55. minutuan eta Neuerrek gelditu ikusgarria egin dio frantziarrari. Gol aukera argienak Heynckesen mutilek izan dituzte eta Mourinhoren taldeak kontraerasoa etengabe bilatu du.

Alemaniako taldearen bigarren zatiko abagune onena Mario Gomezek izan du 85. minutuan, baina aurrelariak ezin izan du behar bezala jaurti eta Real Madrileko jokalariek ederki desbideratu dute baloia kornerrera. Neurketa 2-1ekoarekin luzapenera joan da.

Luzapeneko aurreneko zatian Madrilgo taldea izan da nagusi, baina ia ez da gol aukera argirik izan. Bigarren zatian ere Mourinhoren mutilak gehiago izan dira, baina Bayernek ederki defendatu du eta kanporaketa penaltietan erabaki da.

Penaltietan Neuerrek Cristiano Ronaldoren eta Kakaren jaurtiketak bikain gelditu ditu, baina Casillasek ere Kroosen eta Lahmen jaurtiketak ederki gelditu ditu. Sergio Ramosek penalti erabakigarria huts egin du eta Schweinsteigerrek finalerako sailkatu du Bayern azkenengo penaltian baloia ate barrura bidalita.