Yamahak Valentino Rossi fitxatu du, datozen bi denboraldietarako

Valentino Rossik Ducati taldea utziko du denboraldi amaieran, eta Yamahara itzuliko da datozen bi urteetarako. Hala jakinarazi dute ostiral honetan Ducatik eta Yamahak komunikatu ofizialen bitartez.

Nicky Haydenen kontratua berrituta eta Rossiren irteera kontuan hartuta, datorren denboraldirako talde lehiakorra osatzen saiatuko dela adierazi du Ducatik.

Yamahak, aldiz, Valentino Rossi datozen bi denboraldietarako “etxera” itzuliko dela jakinarazi du. Moto GP mailako lau munduko txapelketa eta 46 lasterketa irabazi zituen Rossik Yamaharekin.

"Rossiren fitxaketa albiste bikaina da Yamaharentzat. Ekainean Jorge Lorenzoren kontratua 2014. denboraldia bukatu arte berritzea lortu genuen, eta, orain, datozen bi urteetarako Valentino Rossi fitxatzea lortu dugu. Lasterketak irabazteko eta Yamaha marka sustatzeko eduki dezakegun talderik onena daukagu", esan du Lin Jarvis Yamahako kirol zuzendariak.