Epailearen aurrean
Garcia Macua, "oso lasai" Iurbenor auzian deklaratu ostean
Erredakzioa
Athleticeko presidenteak adierazi duenez, Ogasun Publikoari BEZa ez ordaintzean egindako "ustezko ekintza irregular guztiak" bera elkartetik irten ondorengoak dira.
Fernando Garcia Macua Athletickeko presidenteak "oso lasai" dagoela adierazi du, Iurbenor kasuan inputatu bezala deklaratu ostean, ia lau orduz. Macua Iurbenorreko lege-aholkularia zenean ustez egindako ustezko delitu sozietarioengatik epailearen aurrean agertu behar izan da.
Epailearen aurrean agertu ostean, kezkatuta ez dagoela esan die Macuak hedabideei, Ogasunari 43 milioi euro ez ordaintzeagatik zabaldutako prozesua zabaldu zutenean bera elkartetik "guztiz aldenduta" zegoelako.
09:15etan heldu da Athleticeko presidentea Juan Jose Muguruza abokatuarekin, eta 13:00 aldera atera da epaitegitik. Jarraian Emilio Prieto Athleticeko beste zuzendariak deklaratu du inputatu gisa.
Jabyer Fernandez enpresaburuaren ustezko delituak Iurbenorren ikertzen ari da Bilboko Instruzioko 6. zenbakiko Epaitegia.
Fiskaltzak Macua eta Athleticeko zuzendaritzako beste kide bat, Emilio Prieto hain zuzen, auzipetzea proposatu du, Iurbenor konpainiaren ustezko irregulartasunekin zerikusia duten "zantzu nahikoak" daudelakoan.
Garcia Macuak ziurtatu du irregulartasunok bera konpainiatik joan eta gero jazo zirela.