Ezkurdia atzelari bezala arituko da, Altunarekin, ostiralean hasiko den Binakako Txapelketan

Joseba Ezkurdia atzelari bezala arituko da, Jokin Altunaren bikotekide gisa, 2025-2026ko Binakako Txapelketan; asteartean aurkeztu dute hori, eta ostiralean hasiko da, Beasainen. Arbizuarrak txapela jantzi zuen txapelketaren aurreko ekitaldian, aurrelari lanetan, Beñat Rezustarekin batera; orain, ordea, atzelari jokatuko du, Buruz Buruko txapeldunarekin. Hauek dira 2025-2026ko Binakako Txapelketan arituko diren bikoteak: Baikok Larrazabal-Mariezkurrena II.a, Laso-Albisu, Artola-Imaz eta Jaka-Izueta aukeratu ditu; Aspek, ordea, Elordi-Zabaleta, Zabala-Martija, P. Etxeberria-Rezusta eta, arestian esan bezala, Altuna III.a-Ezkurdia hautatu ditu. Finala martxoaren 29an izango da, eta Nafarroa Arenan jokatuko dute, Iruñean.

Ohi bezala, zortzi bikote parte-hartzaileek liga bat jokatuko dute, final laurdenetako liga, bi itzulikoa; guztira, hamalau jardunaldi izango ditu liga horrek. Sailkapeneko aurreneko bi tokietako bat eskuratzen duten bikoteek finalerdietako ligaxkarako sailkatzea erdietsiko dute, eta hirugarren, laugarren, bosgarren eta seigarren postuetan amaituko dutenek, aldiz, play-offa jokatuko dute, finalerdietako ligaxka helburu.

Final laurdenetako ligako azken jardunaldia otsailaren 13tik 15erako asteburuan bukatuko da, eta play-offa otsailaren 19an, 20an eta 22an jokatuko dute.

Finalerdietako ligaxka otsailaren 28an hasi eta martxoaren 15ean amaituko da, eta bikote bakoitzak hiru partida jokatuko ditu; lehenengo bi sailkatuak izango dira final handian, 2026ko martxoaren 29an, Iruñean, Nafarroa Arenan.

2025-2026ko Binakako Txapelketa

Bikote parte-hartzaileak:

Altuna III.a-Ezkurdia

Zabala-Martija

Elordi-Zabaleta

P. Etxeberria-Rezusta

Laso-Albisu

Jaka-Iztueta

Larrazabal-Mariezkurrena II.a

Artola-Imaz

Txapelketako datak:

Final laurdenetako liga: azaroaren 21etik, otsailaren 15era

Play-offa: otsailak 19, 20 eta 22

Finalerdietako ligaxka: otsailaren 28tik, martxoaren 15era

Finala: martxoaren 29an, Nafarroa Arenan

Lehen jardunaldiko partidak:

Azaroaren 21ean, Beasainen: Elordi-Zabaleta vs Zabala-Martija

Azaroaren 22an, Logroñon: Altuna III-Ezkurdia vs P. Etxeberria-Rezusta

Azaroaren 23an, Agoitzen: Jaka-Iztueta vs Larrazabal-Mariezkurrena II

Azaroaren 24an, Tolosan: Artola-Imaz vs Laso-Albisu