Martinez de Irujok eta Zabaletak urrezko puntua lortu dute

Martinez de Irujok eta Zabaletak 2013ko Binakako Txapelketako euren laugarren puntua batu dute, Olaizola II.a eta Zabala 16-22 gaindituta, Bilboko Bizkaia pilotalekuan. Aimar Olaizola eta Ibai Zabala sailkapeneko goiko postuetatik aldendu dira, hirugarren porrota jaso baitute.

Asegarceko bikoteak 2-0ekoarekin hasi du neurketa, Jose Javier Zabaletak bi akats argi egin baititu, baina Martinez de Irujo eta Etxarreneko atzelaria suspertu egin dira, eta urdinek 2-2koa jarri dute. Norgehiagoka oso parekatua egon da aurreneko minutuetan, eta Aimar Olaizolak eta Iberoko aurrelariak ezin izan dute aldea handitu (6-6).

Juan Martinez de Irujo eta Jose Javier Zabaleta markagailuan goitik jarri dira (6-7), baina Olaizola II-Zabala bikoteak indarrarekin erantzun du, eta Asegarcekoak, berriz ere, aurretik jarri dira (9-7). Iberoko aurrelariak akats argiak egin ditu aurrealdean, eta gorriek 12-8koa ezarri dute. Hala ere, Aspeko bikoteak 0-4ko partzial garrantzitsua lortu du (12-12).

Pilotariek 14-14koa jarri dute Bizkaia pilotalekuko markagailuan, baina Martinez de Irujok eta Zabaletak tanto garrantzitsuak egin dituzte (14-17). 15-18koaren ostean partida aldapa gora jarri zaie Olaizola II.ari eta Zabalari, eta garaipena Aspeko pilotariek eskuratu dute (16-22).