Finalaurrekoetako ligaxka
Ezkurdia eta Zabaleta garaile, Artola eta Albisuren aurka (22-16)
Leire Etxazarra | eitb.eus
Nafarrak gipuzkoarrak baino gehiago izan dira eta lehen puntua lortu dute finalaurrekoetan. Partida zortzinakoaren ostean hautsi da, gorriek 6 eta 0eko partziala eginda.
Gorriak nagusia izan dira Atano III.eko kantxan. EiTB.
Joseba Ezkurdiak eta Jose Javier Zabaletak lehen puntua lortu dute Binakako Txapelketako finalaurrekoetako ligaxkan.
Nafarrak Iñaki Artolari eta Jon Ander Albisuri gailendu zaizkie 22-16, Atano III.ean jokatutako partidan.
Norgehiagoka oso orekatuta hasi da, zortzina egin duten arte. Hortik aurrera, gorriek 6 eta 0eko partziala egin, eta aldea zabaldu dute markagailuan (14-8). Abantaila bost puntukoa izan da hurrengo tantoetan, urdinak suspertu diren arte. 4 eta 0eko partzial batek partidan sartu ditu berriro (18-16). Garaipena garesti zegoen.
Partida une erabakigarrian sartu da, eta hor Iñaki Artolak huts egin du. Alegiakoak kale egin du hurrengo bi tantoetan, eta garaipena esku-eskura jarri die (20-16) gorriei. Ordura arte, baina, Alegiakoak joko txukuna egin du.
Lau puntuko azkeneko alde hori gehiegi izan da gipuzkoarrentzat, eta azkenean garaipena eta puntua nafarrek eraman dute, merezita: 22-16.