Eusko Label Winter Series
Erkiagak eta Ibarluzeak bi jokotan menderatu dituzte Arbe eta Manci, eta gertu dituzte finalerdiak
EITB MEDIA
Irabazleek argi irabazi dute: lehen seta 15-6ko emaitza lortuta eskuratu dute, eta bigarrenean 15-5. Hala, bi partidatan bi garaipen erdietsita, zazpi puntu dituzte, dagoeneko. Arbek eta Mancik, ordea, ez dute punturik batu, jokatu duten lehenengo neurketan.
Aritz Erkiaga eta Ion Ibarluzea, azken tantoa eginda eta partida amaituta. Argazkia: EITB Media.
Aritz Erkiagak eta Ion Ibarluzeak osatutako bikoteak menderatu egin du Jokin Arbek eta Mikel Mancisidorrek osatzen dutena, astelehenean, Gernika-Lumoko Jai Alai pilotalekuan, 2023-24 denboraldiko Eusko Label Winter Series txapelketako laugarren jardunaldian, B multzoan. Erkiagak eta Ibarluzeak argi irabazi dute: lehen seta 15-6ko emaitza lortuta eskuratu dute, eta bigarrenean 15-5. Hala, bi partidatan bi garaipen erdietsita, Ispasterreko aurrelariak eta Markina-Xemeingo atzelariak zazpi puntu dituzte, dagoeneko, eta gertu dituzte txapelketako finalerdiak; Arbek eta Mancik, ordea, ezin izan dute punturik batu, jokatu duten lehenengo neurketan.
Erkiagak eta Ibarluzeak neurketa bikaina jokatu dute, eta merezita irabazi dute. Gernika-Lumoko zaleek, aurreko astelehenetan ere egin dutenez, bete dituzte Jai Alaiko harmailak, eta ikusi dute nola irabazleek hasieratik menderatu dituzten jokoa eta markagailua. Faboritoak ziren, partida hasi aurretik, eta bete-betean erakutsi dute zergatik. Arbek eta Mancik, Eusko Label Winter Serieserako azken txartela lortu ostean, ez dute inolako aukerarik izan.
Erkiaga eta Ibarluzea ez daude matematikoki sailkatuta finalaurrekoetarako, baina eskura dute finalaren atarikoan izatea. Arberen eta Manciren aurka, lehiako aurreneko tantotik nagusitu dira; azken horiek ilusio handiz ekin diote Eusko Label Winter Serieseko estreinaldiari, baina ezin izan dute euren jokoa gauzatu.
Bi jokoak nahiko antzekoak izan dira. Bietan nagusitu dira Aritz Erkiaga eta Ion Ibarluzea. Erkiagak, berriro ere, erakutsi egin du nolako trebetasuna duen errematerako eta benetako maisua dela partidak kontrolpean izateko; Ibarluzeak, aldiz, neurketa oso ona jokatu du, ez du inolako akatsik egin atzean, eta bizkartzain ezin hobea izan da, bere bikotekidearentzat.
15-6 eta 15-5 izan dira bi setetako emaitzak, eta benetan esanguratsua da markagailua, azaltzeko partida zelan joan den. Bikote bizkaitarrak lan ederra egin du eta lau puntu eskuratu ditu; hiru zituen aurretik, eta, hala, hurbil dituzte finalerdiak, arestian esan bezala.