Winter Serieseko Urreisti-Gorka vs Laduche-Manci partida, ETB1en eta eitb.eus-en

Eñaut Urreisti eta Gorka Sorozabal A taldeko lehen bikoteak Mikel Mancisidor 'Manci' eta Ludovic Laduche izango dituzte aurkari, Eusko Label Winter Series zesta-punta txapelketaren 5. jardunaldian. Gernika-Lumoko Jai Alai pilotalekuan jokatuko duten partida ETB1en eta eitb.eus-en ikusteko aukera egongo da, 21:45etik aurrera.

Urreistik eta Gorkak set bat irabaziz gero, finalaurreko ligaxkarako ia sailkatuta egongo dira, gaur egun taldeko liderrak direlako, zazpi punturekin. Goitia eta Del Rio daude bigarren, puntu bakarrarekin; Laduche eta Manci dira hirugarrenak, punturik gabe, eta azken lekuan, Barandika eta Lopez.

Bestetik, Erkiaga eta Ibarluzea dira nagusi B taldean (zortzi puntu); Urrutia eta Basque dituzte atzetik lau puntura; Johan-Lekerika da hirugarren bikotea, eta azkenik, Olharan eta Zabala daude laugarren postuan.