Bilbao Basketek garaipenaren bidea berreskuratu nahi du

Bilbao Basketek CAI Zaragozaren aurka jokatuko du Endesa Ligako bigarren itzuliko lehenengo norgehiagoka, etxetik kanpora. Rafa Pueyoren gizonek garaipenaren bidea berreskuratu nahi dute azkenengo bi partidak galdu ondoren.

Miribillan hiru garaipen garrantzitsu lortu ostean (Panionios, Iberostar Tenerife eta Nizhni Novgorod), talde beltzak maila jaitsi duela dirudi. Rio Naturaren kontra eta Novgoroden kontra etxetik at partida galdu ditu, eta Eurokopan, L multzoko lidergoa galdu du.

Eurokopan, aldapa gora jarri zaio Bizkaiko taldeari final-zortzirenetarako txartela eskuratzea. Pueyoren gizonek Izar Gorriari Miribillan irabazi behar diote, eta azkeneko jardunaldian, Panionios Atenasen gainditu.

Ligan, playoffetarako sailkatzeko bigarren itzuli ona egin behar du Bilbao Basketek. Errege Kopatik at gelditu ondoren, talde beltzak atseden aste garrantzitsu bat izango du, eta Pueyok gauzak hobetzeko erabili beharko du.

Zaragozako taldea aurkari zuzena izango da. CAIk bederatzi garaipen eta zortzi porrot ditu, eta Bilbao Basketek zazpi porrot eta hamar garaipen. Aragoiko talde gainditzen badu, Bilboko taldea asko hurbilduko litzateke playoffetako postuetarako borrokara.