RETAbet Bilbao Basketek ezin izan dio Bartzelonari irabazi (83-104)

Bartzelona Lassak ez dio Retabet Bilbao Basketi aukerarik eman Bilbao Arenan jokatutako Ligako partidan. Katalanak jaun eta jabe izan dira, eta aise gailendu dira 83-104.

Neurketak ez du kontatzeko askorik izan. Sito Alonsoren taldeak sei minutu bakarrik behar izan ditu garaipena bideratzeko. 7-24 jarri dira aurretik, Kevin Seraphinen gidaritzapean. Bilbotarrak, berriz, ezinean aritu dira.

Bartzelonak erraz sartu ditu puntuak, eta alde nabarmenarekin bukatu dute lehen laurdena: 15-29. Halere, okerragoa ere izan zitekeen, Mumbruk sekulako lana egin baitu.

Markagailuko aldea handitzen joan da (15-34), eta 20 puntuetara iritsi da (33-53) atsedenaldirako minutu eta erdi falta zirenean.

Hirugarren laurdena saskiratze bat gehiago jasota abiatu dute beltzezko gizonez (36-55). Etxekoak partidari buelta ematen saiatu dira, baina Presseyren hiruko batek gauzak bere lekuan jarri ditu berriro (55-70). Hirugarren laurdena alde nabarmenarekin bukatu da: 60-79.

Azken laurdenean gauzak ez dira aldatu. Bartzelonak 25 puntuko aldea eskuratu du (64-87), eta ondoren RETAbet hurbildu egin da markagailuan (83-97), baina alferrik izan da, partidaren bukaeran alde nabarmena erakutsi baitu markagailuak: 83-104. Bartzelona jaun eta jabe izan da.

Fitxa teknikoa

83 - RETAbet Bilbao Basket (15+21+24+23): Tabu, Todorovic (11), Tomàs (9), Hervelle (6) eta Kempton (2) —hasierako boskotea—; Fischer (12), Redivo (18), Hammink (1), Mumbrú (16), Gladness (2), Vucetic (2) eta Salgado (4).

104 - Bartzelona Lassa (29+26+24+25): Heurtel (13), Koponen (3), Hanga (15), Moerman (12) eta Seraphin (14) —hasierako boskotea—; Pressey (10), Ribas (3), Navarro (12), Sanders (8), Claver (4), Oriola (4) eta Tomic (6).

Partzialak: 15-29, 36-55 (atsedenaldian); 60-79 eta 83-104 (amaieran).